მოსწავლე რძალი და კლასის დამრიგებელი დედამთილი

ერთმანეთი საერთო ნაცნობის ქორწილში გაიცნეს და უთიერთობა მალევე ააწყვეს, თუმცა ხშირად ჩხუბობდნენ და შეიძლება ითქვას, ორი წლის განმავლობაში შეყვარებულობის პერიოდზე მეტი ”გაბრაზების პერიოდი” ჰქონდათ.

ერთ-ერთი კამათის შემდეგ ლიკა საერთოდ აღარ ეკონტაქტებოდა ბიძინას, არ პასუხობდა მის ზარებს… ბიძინამ გადაწყვიტა, მოულოდნელად მისულიყო სკოლაში ლიკასთან და შერიგებოდა. ასეც მოიქცა, ნახა ლიკა და ერთ-ერთ კაფეში წაიყვანა. იქ დიდხანს ისაუბრეს, სკოლიდან სახლში დაბრუნების დროს საკმაოდ გადააცილეს და მშობლებიც ანერვიულეს. სამაგიეროდ ყველაფერი კარგად დამთავრდა _ წყვილი შერიგდა.

ისე ხშირად ვჩხუბობდით, მორიგ ჩხუბამდე უნდა მომესწრო მისი ცოლად მოყვანაო _ ხუმრობს ბიძინა. და ერთ დღესაც ჯერ კიდევ სკოლის მოსწავლეს ბიძინამ ცოლობა სთხოვა… ლიკას დის სახლიდან გაიპარნენ. ლიკას დაც ორი თვის გათხოვილი იყო, მას ლიკა დაეხმარა გაპარვაში…

მშობლებისთვის, მიუხედავად იმისა, რომ შვილების ურთიერთობის შესახებ იცოდნენ, მათი გადაწყვეტილება მოულოდნელი იყო. ლიკა ჯერ კიდევ სკოლის მოსწავლე იყო და თან პირველი ქალიშვილიც სულ ახლახან გაუთხოვდათ. მაგრამ მალევე შეეგუენ შვილების გადაწყვეტილებას.

სანამ ქორწილს გადაიხდიდნენ, სურამში უნდოდათ წასვლა, მაგრამ ვერ მოახერხეს, ქობულეთში დაისვენეს.

ქორწილი გაპარვიდან 41 დღის შემდეგ გაიმართა, პატარძალი ტრადიციულად ე.წ. ”ორმოცზე” მივიდა სახლში და მეორე დღეს იქორწინეს კიდეც.

ლიკას თეთრი, მოცულობითი კაბა ეცვა დეკოლტეთი. ბიძინას ჩოხის ჩაცმა უნდოდა, მაგრამ იდეა მეუღლემ დაუწუნა და შავი შარვალ-კოსტიუმი შეარჩია.

დარბაზში ნეფე-პატარძლის კუთხე თეთრსა და ვარდისფერში იყო გაფორმებული, წყვილის გემოვნებით. შესაბამისი ტონალობის იყო ტორტიც. მუსიკალურ გაფორმებაზე ბიძინას მეგობარმა იზრუნა და ქორწილის საერთო სტილისგან გამომდინარე, ძირითადად ტრადიციული მელოდია ჟღერდა, თუმცა მღეროდნენ თანამედროვე უცხოურ სიმღერებსაც.

აღსანიშნავია თაიგულის სროლის ცერემონია _ თაიგულის დაჭერის მსურველებმა ლამის ნეფე-პატარძლის მაგიდა დააზიანეს. დარბაზს დაბალი ჭერი ჰქონდა და ლიკას ნასროლი თაიგული ჯერ ჭერს მოხვდა, შემდეგ კი მაგიდაზე დავარდა. ახალგაზრდები ერთდროულად მიცვივდნენ მაგიდას და თაიგულისთვის ბრძოლაც იქვე გააჩაღეს.

საბოლოოდ, ყველაფერი კარგად დასრულდა და ქორწილმაც შესანიშნავად ჩაიარა.

წყვილი ახლა ქობულეთში ცხოვრობს და ბიძინას დის ქორწილის სამზადისშია. ლიკა ჩაქვის სკოლის მოსწავლე იყო, ახლა კი საბუთები ქობულეთში გადაიტანა და დამრიგებელი, არც მეტი არც ნაკლები, მისი დედამთილია.


ბიძინა სურმანიძე და ლიკა დიასამიძე

Read more »

სიყვარულის დღეს დაწყებული სიყვარულის ისტორია

ერთმანეთი სიყვარულის დღეს, 15 აპრილს გაიცნეს. სიმპათიებიც პირველივე დღიდან გაჩნდა და როცა ლია მშობლებს სასწავლებელში ეგონათ, იგი მირზასთან ერთად სეირნობდა. შეყვარებულები ექვსი თვის განმავლობაში იყვნენ. ამ ხნის მანძილზე ფაქტობრივად არ უკამათიათ და შეუღლებაც მტკიცედ გადაწყვიტეს. ლიასა და მირზას შეხვედრაში ხშირად ლიას მეგობრები ეხმარებოდნენ.
მერე მირზამ ლიას დედა და ძმა გაიცნო… მათ ისე კარგად გაუგეს ერთმანეთს, ლია ხუმრობს, დედაჩემს ჩემზე მეტად მირზა უყვარსო.
ქორწილამდე ტრადიციულად იყო ნიშნობა, მირზა მივიდა ლიას ოჯახში და მშობლებს ლიას ხელი სთხოვა.
ქორწილამდე მირზა ხშირად დადიოდა დანიშნულთან ოჯახში საჩუქრებით.
ქორწილიც ტრადიციული გაიმართა, რომლისთვის მზადება არც ისე დიდხანს მიმდინარეობდა. წყვილმა საქორწილო სამოსიც მალე შეარჩია, დარბაზის დიზაინიც და შესვლისას დაისიც იცეკვა რეპეტიციის გარეშე, მიუხედავად იმისა, რომ ლია ქართულს ვერ ცეკვავს.
ქორწილი მხიარული გამოვიდა, დარბაზში ყველა ცეკვავდა, მათ შორის ლიაც და ნამდვილად არ ყოფილა მორცხვი პატარძალი. თამადამ განსაკუთრებული შეჯიბრიც მოიფიქრა და ცეკვაში არა მოწვეული სტუმრები, არამედ ნეფე-პატარძალი გაეჯიბრა ერთმანეთს.
პატარძალმა თაიგულიც ისროლა, რომელიც მისმა ძმამ დაიჭირა. ლიამ კი დარბაზში მყოფი ბავშვებისგან საჩუქრად ვარდები მიიღო.

მირზა აბაშიძე და ლია ბოლქვაძე

Read more »

პატარძლის დაგეგმილი ქორწილი

ხათუნასა და მინდიას ქორწილი, როგორც ხათუნა ამბობს, სანახაობრივად მდიდარი იყო. ქორწილს თავად პატარძალი ორგანიზატორობდა. 400-კაციანი ქორწილი “ნიკალაში” გაიმართა. “დარბაზში დამონტაჟებული იყო დიდი ეკრანი და ჩვენი ქორწილი პირდაპირ ეთერში გადიოდა. ჩვენი ცეკვისას კი ჭერიდან ბუშტები და ფერადი ლენტები ცვიოდა” _ იხსენებს ხათუნა.
დარბაზში მისულ ნეფე-პატარძალს ვაჟები ტრადიციულად ხანჯლებით შეეგებნენ, გოგონები კი _ ვარდებით ხელში.
დარბაზი გაფორმებული იყო ფეიერვერკით, მოწვეული სტუმრებისთვის კი საჩუქრად ყველა მაგიდაზე თაიგულები იდო.
ფოტოგადაღებისთვის მოწვეული ჰყავდათ ცნობილი ფოტოგრაფი თურქეთიდან და როგორც ხათუნა ამბობს, მის გამო სასაცილო სიტუაციებშიც ვარდებოდნენ _ “ფოტოს გადაღებისას იატაკზე წვებოდა ან ხეებზე დაძვრებოდა, რაც ხალხის ინტერესს იწვევდა”.
მინდია მახარაძემ და ხათუნა გუნდაძემ ერთმანეთი ტელეფონის საშუალებით გაიცნეს, დამეგობრდნენ და ერთ დღესაც მინდიამ ხათუნა მოიტაცა. ხათუნა მეგობრებმა პატრულის საშუალებით დააბრუნეს უკან. იგი ერთი თვის განმავლობაში გაბრაზებული იყო მინდიაზე, შემდეგ კი შეურიგდა და რამდენიმე თვეში იქორწინეს კიდეც.
ქორწილში ხათუნას გამოყვანილი და უკან ღრმად ამოჭრილი, ღია კრემისფერი კაბა ეცვა, რომელიც თავისი გემოვნებით შეაკერინა. სადა ვარცხნილობაც თავისით შეარჩია. რაც შეეხება მინდიას, მას ხათუნას შერჩეული სამოსი ეცვა _ შავი შარვალ-კოსტიუმი კრემისფერი პერანგით და ამავე ფერის ჰალსტუხით.
მუსიკალური გაფორმება ტრადიციული იყო, მუსიკოსები დოლზე და ჭიბონზე უკრავდნენ. ქორწილში მინდიას მეგობარი მღეროდა, რომელიც ხათუნას მოტაცების მონაწილე იყო. ჰყავდათ მოწვეული მოცეკვავეებიც _ ბავშვების ანსამბლები, რომლებიც სადღეგრძელოებს შორის ცეკვავდნენ და ალამაზებდნენ ქორწილს.
რაც შეეხება საჩუქრებს, უამრავ საინტერესო საჩუქარს შორის განსაკუთრებით შთამბეჭდავი მინდიას თურქი მეგობრების საჩუქარი _ სასტუმროს ნომერი იყო.
ქორწილში უამრავი საინტერესო დაგეგმილი და დაუგეგმავი კურიოზიც მოხდა. `ჩვენი ქორწილი კვირა დღეს დაემთხვა, მმაჩის ბიურო ამ დღეს არ მუშაობდა. ამიტომ, გადავწყვიტეთ, ხელისმოწერა გაგვეთამაშებინა. “მმაჩის ბიუროს ქალის” როლი ჩემს მეგობარს მოვარგეთ და ხელი ფიქტიურად მოვაწერეთ, რეალურად კი შვილის, დათას, დაბადებამდე ერთი კვირით ადრე მოვაწერეთ ხელი”. სხვა კურიოზული სიტუაციებიც ბევრი იყო. რადგან საქორწილო შოუს ორგანიზატორი ხათუნა იყო, ის ქორწილის დღეს გასეირნებისას თუ უკვე დარბაზში ყოფნისას განკარგულებებს იძლეოდა _ “დაგეგმილი მქონდა, რომ ჩვენი ცეკვის დროს დარბაზში შუქი უნდა ჩამქრალიყო. ცეკვა რომ დავიწყეთ, ჩემს ძმას გაღიმებული სახით, მაგრამ მკაცრი ხმით ვეუბნებოდი _ შუქი ჩააქრეთ!..”
ქორწილის დასასრულს მინიდისკოთეკა გაიმართა. ახალდაქორწინებულები მეგობრებთან ერთად დიდხანს ერთობოდნენ _ “რამდენიმე ადამიანი ხმის გამაძლიერებელზეც კი ავიდა და იქ ცეკვავდა”.

განსაკუთრებით დასამახსოვრებელი იყო მუხამბაზი, რომელიც პატარძალს მეუღლემ მოწვეულ მოცეკვავეებთან ერთად ფიალებით ხელში შეუსრულა. “სტუმრად გვყავდა მინდიას ნიგერიელი მეგობრებიც, ერთ-ერთმა ძალიან კარგად იმღერა და მთელი დარბაზი ცეკვავდა” _ ამბობს ხათუნა.

მინდია მახარაძე და ხათუნა გუნდაძე

Read more »

თაფლობის თვე აფხაზეთში

თამუნა გერგედავასა და ბესო თურმანიძის სიყვარულის ისტორია უჩვეულოდ დაიწყო _ ბათუმში დასასვენებლად ჩამოსულმა თამუნამ შემთხვევით გაიცნო ბესო. თავიდან ურთიერთობა არ აეწყო, როგორც თამუნა ამბობს, ხშირად კამათობდნენ. თუმცა მათ შორის გრძნობა მალე გაჩნდა და ერთმანეთს დაახლოებით ერთი წლის განმავლობაში ხვდებოდნენ. რადგან თამუნა თბილისში ცხოვრობდა და ბესო ბათუმში, ისინი ერთმანეთს ძირითადად ტელეფონისა და ინტერნეტის საშუალებით ეკონტაქტებოდნენ.
ერთ დღესაც, როცა ბესო მეგობრებთან ერთად მისი დის დაბადების დღეს აღნიშავდა, გადაწყვიტა, რომ თამუნა ცოლად შეერთო. იგი დასთან და მეგობრებთან ერთად გაემგზავრა თბილისში და თამუნა წამოიყვანა _ “ორ საათნახევარში ჩავედით თბილისში და სამი საათის განმავლობაში თამუნას სახლს ვეძებდით. როგორც იქნა მივაგენით, სახლში თამუნა და მისი და მარტონი იყვნენ და ორივე წამოვიყვანეთ” _ ამბობს ბესო.
ქორწილი მალევე გაიმართა. 350-კაციანი ქორწილი გონიოში, სარიტუალო დარბაზ “ერაში” გადაიხადეს. თამუნას კრემისფერსა და ყავისფერში გადაწყეტილი სადა კაბა ეცვა, ბესოს კი ტრადიციული შარვალ-კოსტიუმი თეთრი პერანგით. წყვილს მენდელსონის მარშით შეეგებნენ, შემდეგ კი ტრადიციულად ხანჯლების ქვეშ გაატარეს.
`რადგანაც მე სამეგრელოდან ვარ, აჭარული ტრადიციების შესახებ ბევრი არაფერი ვიცოდი და ძალიან გამიკვირდა, როცა მითხრეს, რომ დარბაზში შემოსვლისას კალათიდან კანფეტები უნდა გადმომეყარა. თუმცა შემდეგ ისე მომეწონა ეს პროცესი, რომ ლამის თითო-თითო კანფეტებს ვისროდი. ბოლოს კი ბესომ ერთდროულად ამოიღო კალათიდან რამდენიმე კანფეტი და თვითონვე გადაყარა, ოღონდ მისი მეგობრებისკენ” _ იხსენებს თამუნა.
მართალია ქორწილი ტრადიციული იყო, მაგრამ თანამედროვე ელემენტებსაც შეიცავდა. სადღეგრძელოების პარალელურად ქორწილს კონკურსები და სხვადასხვა სახის თამაშები ალამაზებდა. გამარჯვებულებს ქართული ტრადიციული სასმისები გადაეცათ საჩუქრად. გამორჩეული იყო მაგიდების გაფორმებაც _ თითქმის ყველა კერძს სხვადასხვა ყვავილის ფორმა ჰქონდა.
საინტერესო იყო თაიგულის სროლის მომენტი _ პატარძალს მეჯვარის ნაჩუქარი თაიგული ძალიან მოეწონა და არ ემეტებოდა გადასაგდებად, ამიტომ ქორწილამდე ნახევარი საათით ადრე ბესოს დის ინიციატივით სპეციალურად ამ ცერემონიისთვის დაამზადებინეს ერთგვარი “პატენტი”. პატარძლის მიერ ნასროლი თაიგული პატარძლის ბიძიამ დაიჭირა და შემდეგ მან ისროლა ახალგაზრდებში.
წყვილმა ქორწილის დღესვე დაიწერა ჯვარიც ახლშენის სამების ეკლესიაში.
ქორწილიდან რამდენიმე ხნის შემდეგ, მეგრული ტრადიციის მიხედვით, უნდა გამართულიყო ე.წ. “დაბრუნებითი ქორწილი” (მეორე ქორწილი პატარძლის დედულეთში, სადაც მიპატიჟებულია ახალი სიძის ოჯახის წევრები და ნათესავები). თამუნას ნათესავებმა გადაწყვიტეს, ქორწილი აფხაზეთში გაემართად. ენგურზე 25 ადამიანი გადავიდა და ძალიან ლამაზი, ტრადიციული ქორწილიც გაიმართა. ახალდაქორწინებულები თითქმის 20 დღეს დარჩნენ იქ და დაათვალერეს რამდენიმე ქალაქი. ეს იყო ერთგვარი თაფლობის თვე აფხაზეთში.
თამუნასა და ბესოს ოჯახს მალე ახალი, პატარა წევრი შეემატება.

თამუნა გერგედავა და ბესო თურმანიძე

Read more »

როგორ გამოვაცხოთ აჭარული ხაჭაპური

ამ კერძის დასამზადებლად რჩევები - კაფე ბარ _ “ლაგუნას” მზარეულმა _ რომან რომანოვმა მოგვცა, იგი ექვსი თვე ეუფლებოდა ამ ხელობას და დღეს მართლაც უგემრიელეს ხაჭაპურს აცხობს.
აჭარაში ყველაზე გავრცელებული და ერთ-ერთი უგემრიელესი კერძის _ აჭარული ხაჭაპურის დამზადება სახლის პირობებში, როგორც აღმოჩნდა, არც ისე რთული საქმეა. რომანის რჩევით, ცომი თბილი წყლით უნდა მოიზილოს. ცომს გაურიეთ ცოტა მარილი და საფუარი, ზილეთ 5 წუთის განმავლობაში, დაელოდეთ მის გაფუებას, რის შემდეგაც შეუდექით აჭარულ ხაჭაპურზე ნავისებრი ფორმის მიცემას. აიღეთ დაახლოებით 200 გრ. ცომი და მას შემდეგ, რაც მას 1სმ.-მდე გააბრტყელებთ (კიდეებში ოდნავ სქლადაც შეიძლება) მიეცით მას ოვალური ფორმა და უბრალოდ გადმოუკეცეთ ორი მხარე, ისე რომ, შუაში ადგილი არ დარჩეს ანუ ორივე ფრთა ერთმანეთს მიებჯინოს, დარჩენილი ორი ბოლო(ყურები) კი მოუმრგვალეთ, შემდეგ თითები ნაკეცში ჩავყოთ და გადმოკეცილი ფრთები მარჯვენა და მარცხენა მხარეს მივაჩოჩოთ. როცა ცომი ნავის ფორმას მიიღებს, მასში მოათავსეთ გახეხილი ყველი.
«ლაგუნას» კიდევ ერთი მზარეულის _ ალიოშა იანდიანის რჩევით, კარგი იქნება თუ იმერულ ყველთან ერთად, სულგუნსაც გაურევთ და ცოტა კვერცხს ჩაუმატებთ (3 პორცია ხაჭაპურზე - 1კვერცხი). ხაჭაპური შედგით ღუმელში.

იმის მიზეზი რომ ხშირად სახლში გამომცხვარი აჭარული ხაჭაპური ისეთივე გემრიელი არ გამოდის, როგორიც კაფეში - არის ის, რომ აქ იგი 500გრადუსზე იწვის, ამიტომ სახლის ღუმელი მაქსიმალურ ტემპერატურაზე ჩართეთ. საშუალოდ 20-25წუთის შემდეგ, როცა ხაჭაპური შეწითლებას დაიწყებს, გამოიღეთ და ყველში ჩაუმატეთ კვერცხის გული (სასურველია სოფლის კვერცხი) და ისევ ღუმელში შედგით. დაახლოებით 2-3 წუთში, როცა ხაჭაპური საბოლოოდ შეწითლდება, კერძი მზადაა, დაუმატეთ 1-2 ნაჭერი კარაქი.

გემრიელად მიირთვით!

Read more »

ბავშვის ოთახი

ნებისმიერი ოთახის ინტერიერი მნიშვნელოვან ზეგავლენას ახდენს ადამიანის ხასიათზე. ამიტომაც განსაკუთრებით დიდი ყურადღებაა საჭირო ბავშვის ოთახის მოწყობისას. ინტერიერის გაფორმებისას მნიშვნელოვანია ფერთა პალიტრა. ფერების საშუალებით შესაძლოა არამარტო ოთახის მოცულობის ვიზუალურად გაზრდა და შემცირება, არამედ ადამიანის განწყობის მართვაც.
საღებავების მწარმოებელი კომპანია "კაპაროლის" კონსულტანტი, ინგა ლორთქიფანიძე, გვირჩევს, რომ სასურველია, ბავშვის ოთახი თბილი და წყნარი ფერებით _ იისფერი, მწვანე, ღია ყვითელი... _ შევღებოთ. ეს ფერები დადებითად მოქმედებს ბავშვის ფსიქიკაზე, განსხვავებით წითელისა და სხვა მყვირალა ფერებისგან, რომლებიც აღაგზნებს და ძაბავს ბავშვის გონებას.
თუმცა წითელი ფერის დეტალების შეტანა ინტერიერში მისაღებია, ისინი ხალისს და სიფხიზლეს ჰმატებენ ოთახს. ასევე შესაძლებელია კედელზე სხვადასხვა კონტურისა და ნახატის გამოყვანაც _ ამ შემთხვევაში მხოლოდ ხელოსნის ოსტატობა და თქვენი ან ბავშვის ფანტაზიაა საჭირო.

მყუდრო და სასიამოვნო გარემოს შესაქმნელად მხოლოდ ოთახის შეფერილობა არ არის საკმარისი. ბავშვის ოთახს კომფორტული ავეჯი უნდა ავსებდეს. დღეს ამგვარი ავეჯის დიდი არჩევანია. ესთეტიკური თვალსაზრისით, სასურველია, ოთახის ფერიც ავეჯის ფერს ეხამებოდეს.
საბავშვო ოთახის კომპლექსში, ძირითადად ერთი საწოლი (ორი ბავშვისთვის ორსართულიანი საწოლებიც არსებობს), გარდერობი, კომოდი და სამუშაო მაგიდა შედის. ავეჯის სახლში _ "i peki", საბავშვო საძინებლის კომპლექტი, ცოტა მეტი შემადგენლობით, საშუალოდ, 2000$ ღირს.
ხშირია შემთხვევა, როცა სახლში არ არის გამოყოფილი საბავშვო ოთახი. ასეთ დროს, შესაძლოა მას საერთო ოთახში გამოუყოთ კუთხე. ბავშვის კუთხე შეგიძლიათ ოთახის ძირითადი ფერიდან განსხვავებული, მაგრამ მასთან შეხამებული ფერით შეღებოთ, გააფორმოთ რაიმე ორნამენტით, დადგათ სამუშაო მაგიდა, წიგნების თარო და კუთხე პატარა ფერადი სუვენირებით გააწყოთ _ იქნება ეს სურათები, ნახატები თუ სხვა დეკორატიული ნივთები.

ბავშვის ოთახისა თუ კუთხის მორთვა ძალიან მარტივია. თუკი თქვენი შვილი იმ ასაკშია, რომ თავად შეუძლია არჩევანის გაკეთება, აუცილებლად გაუწიეთ ანგარიში მის სურვილებს და ეცადეთ, ოთახი მისი გემოვნებით მოაწყოთ. ბავშვის ოთახი _ ეს მისი პატარა სამყაროა, სადაც მას ყოველთვის შეეძლება ხალისით იმეცადინოს, გაერთოს და მშვიდად მოისვენოს.

Read more »

მამაკაცი და სტილი

ზურა ჩართოლანი პროფესიით რეჟისორია. მისთვის ჩაცმულობა, ერთ–ერთი უმნიშვნელოვანესი ფაქტორია – თვითგამოხატვისთვის. იმისთვის, რომ კარგად გამოიყურებოდეს, საკუთარი გემოვნებით ხელმძღვანელობს. მიიჩნევს, რომ მამაკაცის გარდერობში ყველა სტილის სამოსი უნდა იყოს.
"სამოსს ყველგან ვყიდულობ, ცნობილ ბრენდების მაღაზიებში, ბაზრობაზეც და სექენდ ჰენდშიც. ხშირად სექენდ ჰენდში, პატარა ხარვეზის გამო, ძვირადღირებული ბრენდების ტანისამოსი ხვდება. თუმცა სულ არაა სამარცხვინო, რომ ფინანსების უქონლობის გამო ვინმემ მეორადი მოხმარების სამოსი შეიძინოს. ბაზრობაზე ნაყიდი სამოსი ყველას აცვია, მეორადებში კი ყოველთვის ნახავ ორიგინალურს და დარწმუნებული მაინც იქნები, რომ ასეთი სამოსით სხვა არავინ გაივლის", _ ამბობს ზურა.
თუკი გინდათ, რომ სხვებისგან განსხვავებული ტანსაცმელი გეცვათ, ზურა გირჩევთ, თავად მოიფიქროთ სვიტერის ან ჟაკეტის დიზაინი და ვინმეს მოაქსოვინოთ.
ყველა მამაკაცის გარდერობში მოიპოვება ჯინსის ერთი შარვალი მაინც, რომლის ფერსა და ფორმაზე ძალიან ბევრია დამოკიდებული _ სამოსის ფერი და ფორმა ვიზუალურად ამაღლებს ან აპატარავებს ადამიანს. `დაბალი ბიჭები უნდა მოერიდონ ისეთი სამოსის ჩაცმას, რომელიც მათ სიდაბლეს გაუსვამს ხაზს. ასეთი სამოსია, მაგალითად, ფართე, ჩაჩაჩული შარვალი და გრძელცხვირიანი ფეხსაცმელი. მათ უნდა ჩაიცვან რაიმე გამოყვანილი მაისურები, სიგრძივი ზოლებით ან სვიტერი, ასეთივე ნაქსოვი ორნამენტით. უნდა მოერიდონ გადმოშვებულ მაისურებს და მუქ ფერებს, _ ამბობს ზურა.
უმეტესობა დღეს მუქი ფერის სამოსს ატარებს. შავი ფერი ადამიანს ინდივიდუალურობას უკარგავს. ფერით შეიძლება შენი ხასიათი განსაზღვრო. მთავარია, ფერები ერთმანეთს ეხამებოდეს. კაცი მაინც უფრო ექსპრესიულია და ტანსაცმელი რაღაცას უნდა გამოხატავდეს. თუ ქალისთვის თავის მოწონება გსურს, არ უნდა იმალებოდე რუხ ფერებში და უფრო გაბედული უნდა იყო ჩაცმულობასა და საქციელშიც".
ზურა ამბობს, რომ ჯობია გეცვას ის, რაშიც კომფორტულად გრძნობ თავს. სხვაზე მიბაძვას აზრი არა აქვს. ვიღაც აუცილებლად გამოჩნდება, ვისაც ისეთი მოეწონები, როგორიც ხარ. ის, რაც გაცვია, შენს ხასიათს უნდა ესადაგებოდეს, წინააღმდეგ შემთხვევაში, თამაში გიწევს, რითაც საკუთარ მეობას კარგავ.
მამაკაცის აქსესუარი საკმაოდ მნიშვნელოვანი დეტალია მის ჩაცმულობაში. ნებისმიერი აქსესუარი თქვენს ხასიათს და გარკვეულ ღირსებებს უნდა უსვამდეს ხაზს და თქვენი პიროვნებიდან უნდა გამომდინარეობდეს. ზურას თქმით, მამაკაცის აქსესუარი იაფფასიანი არ უნდა იყოს _ "იაფფასიანში მხოლოდ ფასს არ ვგულისხმობ. სტილური მამაკაცის აქსესუარი არ უნდა იყოს უგემოვნო. ხელნაკეთი აქსესუარები ყოველთვის მომგებიანია. იმას გააჩნია, თუ რაზე გინდა აქცენტის გაკეთება... ჩვენთან რატომღაც მოდაშია ოქროს ჯაჭვები და უფრო მეშჩანური აქსესუარები. შესაძლოა, რამე ხელნაკეთი აირჩიო, ხით გაწყობილი ყელსაბამი აფრიკულ სტილში ან სამაჯური".
ასე რომ, თუ საკუთარი განუმეორებელი სტილის შექმნა გსურთ, მაქსიმალურად ეცადეთ საკუთარი ინდივიდუალურობა შეინარჩუნოთ, რადგან სტილურად ჩაცმა არ ნიშნავს ატარო ის, რაც მოდაშია. იგი გაცილებით უფრო მეტია, ვიდრე, უბრალოდ, ლამაზი სამოსი. თქვენი ჩაცმის სტილი თქვენს პიროვნებას, ინტერესის სფეროს და მისწრაფებებს წარმოაჩენს.
ზურას აზრით, ზედმეტად თავის მოვლა და ჩაცმაზე გადაყოლა მიზანშეწონილი არ არის _ "ეს არც საპირისპირო სქესში იწვევს მოწონებას. ქალებს უფრო მოსწონთ მამაკაცური და ექსპრესიული კაცები, რომლებშიც მამაკაცური საწყისი უფრო ძლიერად არის გამოხატული. თუ მამაკაცი ამ თვისებებს გაუსვამს ხაზს თავისი ჩაცმულობით და ქცევით, ალბათ, ყველა ქალის ინსტინქტზე იმოქმედებს".

Read more »

გემოვნებიანად ჩაცმის მარტივი და ხელმისაწვდომი გზები

აღმოჩნდა, რომ პოპულარული ბრენდების, საკმაოდ ხარისხიანი და სტილური სამოსი, ეგრეთ წოდებულ "სექენდ ჰენდში" სულ რაღაც 7-8 ლარად შეიძლება შეიძინო.
რატომღაც არსებობს მოსაზრება, რომ აქ მხოლოდ გაცვეთილი, უვარგისი ძველმანები იყიდება, რომელთა შეძენაც ან არაფერში გჭირდება, ან იმ საზოგადოების აზრს უფრთხი, რომლის წარმომადგენლებიც მალულად, მაგრამ ძალიან ხშირად სტუმრობენ ძველმანების მაღაზიებს.
სულ ახლახან ბათუმის ყველა "სექენდ ჰენდი" იმ მიზნით შემოვიარე, რომ გამერკვია, თუ რამდენად ვარგისიანი საქონელი იყიდება აქ. ძველმანებში საოცრად მრავალფეროვანი არჩევანი დამხვდა: sisley, benetton, espriti _ ეს ის ბრენდებია, რომლებიც, ჩვეულებრივ, ძალიან ძვირი ღირს, აქ კი ასე უყურადღებოდ ეყარა `ძონძების~ გვერდით.
ხშირად აქ სულ ახალი სამოსი იყიდება. მას შემდეგ, რაც ამ ტანსაცმელს ევროპის საუკეთესო მაღაზიებში ჩამოფასებულის სტატუსს ანიჭებენ, ისინი ისეთ ქვეყნებში იგზავნება ან იყიდება, რომლებიც დახმარებას საჭიროებენ. ის სამოსი კი, რომელიც უკვე მეორადი მოხმარებისაა, სრულ დეზინფექციას გადის და ისე გააქვთ გასაყიდად.
სპეციფიკური სუნი, რომელიც ხშირად გვხვდება ამგვარ მაღაზიებში, სწორედ დეზინფექციის შედეგია. აქ შეძენილ მეორადი მოხმარების ნივთს სპეციფიკური სუნი რომ მოაცილოთ, საჭიროა, მისი უბრალოდ ცხელ წყალში რამდენიმე საათით გაჩერება და შემდეგ გარეცხვა.
ჩემი "ძონძებში" მოგზაურობა უშედეგოდ არ დასრულებულა. აქ შესანიშნავი პატარა ზურგჩანთა და უგის ჩექმები (Uggs-ზამშის ჩექმა დაბალ ძირებზე) შევიძინე. მათი ფასი საქართველოშიც და უცხოეთშიც 120 დოლარამდეა. მე კი სულ რაღაც 15 ლარი გადავიხადე.

Read more »

ქორწილი შოუ

“ქორწილს ცხოვრებაში ერთ-ერთი მნიშვნელოვანი ადგილი უჭირავს და უნდა შეეცადო, ლამაზი და გამორჩეული ქორწილი გადაიხადო” _ ამბობს ჯემალ თავართქილაძე. მან 2009 წლის სექტემბერში იქორწინა და როგორც თვითონ თქვა, ძალიან ლამაზი ქორწილი ჰქონდათ.

ჯემალმა და შორენამ ერთმანეთი შორენას მეგობრის და ჯემალის ნათესავის მეშვეობით გაიცნეს. აღმოჩნდა, რომ მას და ჯემალის მამას ეს გაცნობა დაუგეგმავთ, წყვილმა კი ამის შესახებ არაფერი იცოდა. ისინი ჯერ დამეგობრდნენ, ერთი წლის განმავლობაში შეყვარებულები იყვნენ და შემდეგ იქორწინეს.

წყვილმა ტელეპროექტ “ჯეოსტარის” ერთ-ერთი მონაწილის ფანკლუბში ნახა ბიძინა მიქელაძის და მისი მეგობრების მიერ დადგმული შოუ. ჯემალმა და შორენამ გადაწყვიტეს მათი ქორწილიც ამ შოუთი გაელამაზებინათ და კმაყოფილნიც დარჩნენ.

შორენა: “წინასწარ არ ვიცოდით, როგორი იქნებოდა ქორწილი, ფაქტობრივად, სიურპრიზი გამოვიდა. ჯვრისწერის შემდეგ სარიტუალო დარბაზში მისულებს შოუს ორგანიზატორები კოსტიუმირებული სანახაობით შეგვეგებნენ, ამის შემდეგ კი იყო სხვადასხვა კონკურსი, პანტომიმა და შოუ ცეცხლებით. ქორწილი ტრადიციულად თამადამ დაიწყო, თუმცა ბოლომდე ტრადიციულად არ გაგრძელებულა, პარალელურად ქართული სადღეგრძელოებისა, სხვადასხვა წარმოდგენები, კონკურსები მიმდინარეობდა. განსაკუთრებით დამამახსოვრდა ფოტოჩვენება, რომელიც სარიტუალო დარბაზის დიდ ეკრანზე გაიმართა, ნაჩვენები იყო ჩვენი ბავშვობისა და შეყვარებულობის პერიოდების ამსახველი ფოტოები”.

ქორწილი გონიოში, სარიტუალო დარბაზ “ერაში” გაიმართა. შორენამ საქორწილოდ კაბა თავისი გემოვნებით შეაკერინა _ კაბა თეთრი აჟურული ბადით იყო გაფორმებული და მას განსაკუთრებულ დახვეწილობას ღრმა დეკოლტე მატებდა. მიუხედავად იმისა, რომ ვარცხნილობა ინტერნეტით შეარჩიეს, იგი სრულიად ესადაგებოდა წყვილის კლასიკურ იმიჯს. რაც შეეხება ჯემალს, მას ტრადიციული _ შავ-თეთრი შარვალ-კოსტიუმის ნაცვლად კრემისფერ და თეთრ ტონალობებში გადაწყვეტილი სამოსი ეცვა. დარბაზიც კლასიკური ღია ფერებით იყო გაფორმებული და დღეს პოპულარული გრძელი მაგიდების ნაცვლად, პატარა და ლამაზად გაფორმებული მაგიდები იდგა.

საღამოს მუსიკალურ გაფორმებაზეც შოუს ორგანიზატორებმა იზრუნეს. შვიდკაციანი მუსიკალური ჯგუფი ასრულებდა როგორც ტრადიციულ, ისე თანამედროვე სიმღერებს.

კონკურსებს შორის გამოირჩეოდა სადღეგრძელოების კონკურსი, რომელშიც ყველა ასაკის ადამიანი ჩაერთო. ბოლოს გამოვლინდა გამარჯვებული და დაჯილდოვდა კიდეც. პრიზი მართლაც შთამბეჭდავი იყო _ ფერადი მინებით გაფორმებული ულამაზესი თასი, რომელიც სპეციალურად საფრანგეთიდან ჩამოატანინეს. ტრადიციულად, წარმოითქვა ხსოვნის სადღეგრძელოც, ოღონდ იმ განსხვავებით, რომ დარბაზში შუქი ჩააქრეს და 300 მოწვეულ სტუმარს ანთებული სანთლები ეჭირა ხელში.

გაიმართა აუქციონიც, ორიგინალურად გაფორმებული ვარდის საწყისი ფასი ერთი ლარი იყო, ბოლოს კი 100 ლარად გაიყიდა. საბოლოოდ ვარდი პატარძალმა მიიღო საჩუქრად.

განსხვავებული იყო საქორწილო ტორტიც. ის ტრადიციული კრემებიანი ტორტისგან განსხვავებით, თეთრი მინანქრითა და რამდენიმე წითელი ვარდით იყო გაფორმებული. ტორტი იმავე დღესვე დაჭრეს. ქორწილის შემდეგ კი ნეონებით გაფორმებულ დარბაზში დისკოთეკა გაიმართა.

შოუს საერთო ღირებულების დასახელებისგან წყვილმა თავი შეიკავა, თქვეს, რომ ზოგისთვის შეიძლება ძვირი იყოს, ზოგისთვის კი _ იაფი. ჯემალ თავართქილაძე: “რაც მთავარია, არავინ არც ხარჯზე ინანებს და არც შოუზე. მომსახურების ხარისხი ნამდვილად აღემატება ფასს”.

შორენა კონცელიძე და ჯემალ თავართქილაძე

Read more »