ქორწილი შოუ

“ქორწილს ცხოვრებაში ერთ-ერთი მნიშვნელოვანი ადგილი უჭირავს და უნდა შეეცადო, ლამაზი და გამორჩეული ქორწილი გადაიხადო” _ ამბობს ჯემალ თავართქილაძე. მან 2009 წლის სექტემბერში იქორწინა და როგორც თვითონ თქვა, ძალიან ლამაზი ქორწილი ჰქონდათ.

ჯემალმა და შორენამ ერთმანეთი შორენას მეგობრის და ჯემალის ნათესავის მეშვეობით გაიცნეს. აღმოჩნდა, რომ მას და ჯემალის მამას ეს გაცნობა დაუგეგმავთ, წყვილმა კი ამის შესახებ არაფერი იცოდა. ისინი ჯერ დამეგობრდნენ, ერთი წლის განმავლობაში შეყვარებულები იყვნენ და შემდეგ იქორწინეს.

წყვილმა ტელეპროექტ “ჯეოსტარის” ერთ-ერთი მონაწილის ფანკლუბში ნახა ბიძინა მიქელაძის და მისი მეგობრების მიერ დადგმული შოუ. ჯემალმა და შორენამ გადაწყვიტეს მათი ქორწილიც ამ შოუთი გაელამაზებინათ და კმაყოფილნიც დარჩნენ.

შორენა: “წინასწარ არ ვიცოდით, როგორი იქნებოდა ქორწილი, ფაქტობრივად, სიურპრიზი გამოვიდა. ჯვრისწერის შემდეგ სარიტუალო დარბაზში მისულებს შოუს ორგანიზატორები კოსტიუმირებული სანახაობით შეგვეგებნენ, ამის შემდეგ კი იყო სხვადასხვა კონკურსი, პანტომიმა და შოუ ცეცხლებით. ქორწილი ტრადიციულად თამადამ დაიწყო, თუმცა ბოლომდე ტრადიციულად არ გაგრძელებულა, პარალელურად ქართული სადღეგრძელოებისა, სხვადასხვა წარმოდგენები, კონკურსები მიმდინარეობდა. განსაკუთრებით დამამახსოვრდა ფოტოჩვენება, რომელიც სარიტუალო დარბაზის დიდ ეკრანზე გაიმართა, ნაჩვენები იყო ჩვენი ბავშვობისა და შეყვარებულობის პერიოდების ამსახველი ფოტოები”.

ქორწილი გონიოში, სარიტუალო დარბაზ “ერაში” გაიმართა. შორენამ საქორწილოდ კაბა თავისი გემოვნებით შეაკერინა _ კაბა თეთრი აჟურული ბადით იყო გაფორმებული და მას განსაკუთრებულ დახვეწილობას ღრმა დეკოლტე მატებდა. მიუხედავად იმისა, რომ ვარცხნილობა ინტერნეტით შეარჩიეს, იგი სრულიად ესადაგებოდა წყვილის კლასიკურ იმიჯს. რაც შეეხება ჯემალს, მას ტრადიციული _ შავ-თეთრი შარვალ-კოსტიუმის ნაცვლად კრემისფერ და თეთრ ტონალობებში გადაწყვეტილი სამოსი ეცვა. დარბაზიც კლასიკური ღია ფერებით იყო გაფორმებული და დღეს პოპულარული გრძელი მაგიდების ნაცვლად, პატარა და ლამაზად გაფორმებული მაგიდები იდგა.

საღამოს მუსიკალურ გაფორმებაზეც შოუს ორგანიზატორებმა იზრუნეს. შვიდკაციანი მუსიკალური ჯგუფი ასრულებდა როგორც ტრადიციულ, ისე თანამედროვე სიმღერებს.

კონკურსებს შორის გამოირჩეოდა სადღეგრძელოების კონკურსი, რომელშიც ყველა ასაკის ადამიანი ჩაერთო. ბოლოს გამოვლინდა გამარჯვებული და დაჯილდოვდა კიდეც. პრიზი მართლაც შთამბეჭდავი იყო _ ფერადი მინებით გაფორმებული ულამაზესი თასი, რომელიც სპეციალურად საფრანგეთიდან ჩამოატანინეს. ტრადიციულად, წარმოითქვა ხსოვნის სადღეგრძელოც, ოღონდ იმ განსხვავებით, რომ დარბაზში შუქი ჩააქრეს და 300 მოწვეულ სტუმარს ანთებული სანთლები ეჭირა ხელში.

გაიმართა აუქციონიც, ორიგინალურად გაფორმებული ვარდის საწყისი ფასი ერთი ლარი იყო, ბოლოს კი 100 ლარად გაიყიდა. საბოლოოდ ვარდი პატარძალმა მიიღო საჩუქრად.

განსხვავებული იყო საქორწილო ტორტიც. ის ტრადიციული კრემებიანი ტორტისგან განსხვავებით, თეთრი მინანქრითა და რამდენიმე წითელი ვარდით იყო გაფორმებული. ტორტი იმავე დღესვე დაჭრეს. ქორწილის შემდეგ კი ნეონებით გაფორმებულ დარბაზში დისკოთეკა გაიმართა.

შოუს საერთო ღირებულების დასახელებისგან წყვილმა თავი შეიკავა, თქვეს, რომ ზოგისთვის შეიძლება ძვირი იყოს, ზოგისთვის კი _ იაფი. ჯემალ თავართქილაძე: “რაც მთავარია, არავინ არც ხარჯზე ინანებს და არც შოუზე. მომსახურების ხარისხი ნამდვილად აღემატება ფასს”.

შორენა კონცელიძე და ჯემალ თავართქილაძე

Read more »