შლიაპის დამზადება

შლიაპა ყოველთვის მოდური და აქტუალურია. იგი წელს აქტუალობას ცხელი ზაფხულის შემდეგაც არ დაკარგავს, რადგან განსაკუთრებით ცხელ შემოდგომას გვპირდებიან. მართალია, ბაზრობებსა და მაღაზიებში სხვადასხვა ფორმისა და ფერის შლაპები იყიდება, თუმცა მათი დამზადება სახლის პირობებშიც შესაძლებელია. იყიდეთ ბაზრობაზე სასურველი ფერის უბრალო პანამა, რომელიც 2-3 ლარი ღირს.

დასაწყისისთვის, ოდნავ აკეცეთ მისი ერთი მხარე.

მეორე ნაბიჯია აკეცილი ნაწილის დეკორატიული ყვავილით დამაგრება.

ასეთ შლაპას ყველაზე მეტად მოუხდება თექისგან დამზადებული ყვავილი, რომლის შეძენა ქსოვილების მაღაზიაში შეგიძლიათ. თუ აქ ვერ იპოვეთ, სამკაულების ან თმის სამაგრების მაღაზიაში შეგიძლიათ შეიძინოთ თმის სამაგრი, მოაცილოთ მასზე მიმაგრებული ყვავილი და ქუდს მიაწებოთ. უკეთესია ყვავილს ე.წ. "კნოპკით" თუ დაამაგრებთ _ მისი მოხსნა უფრო მარტივი იქნება და ასე რამდენიმე სხვადასხვა პანამის მორთვას შეძლებთ.

ასე თქვენს გარდერობს საკმაოდ ორიგინალური საზაფხულო ქუდები შეემატება.

Read more »

სახელობითი ჩარჩოები

ყველა დედა ბავშვის ფოტოებს ელექტრონული სახით კომპიუტერში ან დისკებზე, ან სპეციალურ ალბომებში ინახავს. იმისთვის, რომ გაიხსენოთ როგორი იყო თქვენი შვილი რამდენიმე თვის წინ, გჭირდებათ კომპიუტერი, DVD ან ფოტოალბომების გადაქექვა. ამის გაკეთება აღარ დაგჭირდებათ, თუკი ოთახის კედლებს გააფორმებთ ბავშვის ფოტოებით, რომლებიც მოთავსებული იქნება სახელობით ჩარჩოებში.

მათი დამზადება ძალიან მარტივია, დაგჭირდებათ ფოტოს უბრალო სწორკუთხოვანი ჩარჩო, მუყაო, ქაღალდის წებო ან ე.წ. “სკოჩი” და ბავშვის ფოტოები. ჩარჩოს ზომის მუყაოზე დააწერეთ ბავშვის სახელი ან ინიციალები და გამოჭერით. თუ ხელით ვერ მოახერხებთ დაწერას, შაბლონი კომპიუტერის საშუალებით გაამზადეთ, ამის გაკეთებისთვის ყველაზე მარტივი გზა WORD-ის ან PAINT -ის პროგრამების გამოყენებაა.

მას შემდეგ, რაც ბავშვის სახელის შესაბამისი ასობგერები მზად იქნება, დააწებეთ მას შესაბამისი ფოტოები და ჩადეთ ჩარჩოში. შეგიძლიათ მთელი სახელი მოათავსოთ ერთ ჩარჩოში ან შეიძინოთ იმდენი ჩარჩო, რამდენი ასობგერითაც შედგება თქვენი პატარას სახელი და თითო ჩარჩოში თითო ფოტო-ასობგერა ჩადეთ. არაფერი დაშავდება, თუ ჩარჩოები სხვადასხვაგვარი იქნება, ასე თქვენი ნამუშევარი უფრო საინტერესო და ორიგინალური გამოვა.

ასეთი “სახელობითი” ჩარჩოები ბავშვს გაახალისებს, თქვენს სახლს კი ინდივიდუალობასა და ორიგინალობას შემატებს.

Read more »

ორიგინალური ფოტოკუბიკი

ფოტოების კომპიუტერში ან ფოტოალბომებში შენახვა და დროდადრო მათი გადმოლაგება არც ისე მოსახერხებელი და სასურველია. არადა, ზოგჯერ ძალიან გვინდა საყვარელი ადამიანები ახლოს გვყავდეს, ფოტოთი მაინც.

გთავაზობთ ფოტოებიანი კუბიკის დამზადების წესს, რომელსაც ერთ-ერთ ინტერნეტსაიტზე გავეცანი. ამისათვის დაგჭირდებათ მუყაო, 6 ფოტო, მაკრატელი, სახაზავი და წებო.

დასაწყისისთვის, დახატეთ კუბის ფორმა მოცემული ფოტოს მიხედვით. აირჩიეთ თქვენთვის მოსახერხებელი და სასურველი ზომა _ 5 ან 10 სანტიმეტრი ყველაზე მისაღები ზომაა.

გამოჭერით მუყაო ნახაზის მიხედვით და ყველა გვერდზე მიაწებეთ სასურველი ფოტო. ყურადღებით იყავით, ფოტოს ზომა კუბის გვერდის ზომას ზუსტად უნდა ემთხვეოდეს. მას შემდეგ, რაც წებო კარგად გაშრება, სახაზავის დახმარებით შაბლონი ისე გადაღუნეთ, რომ ფოტოები გარე მხარეს დარჩეს. წაუსვით წებო შიდა მოკლე გვერდებს, რომელთა საშუალებით უნდა შეიკრას თქვენი ფოტოკუბიკი. დაელოდეთ გაშრობას და შემდეგ ფოტოკუბიკს შეურჩიეთ შესაბამისი ადგილი. ასეთი ფოტოკუბიკი შეგიძლიათ მოათავსოთ სამუშაო მაგიდაზე და დღეში რამდენჯერმე გადაატრიალოთ იგი, ყოველ გადატრიალებაზე ახალ საყვარელ სახეს დაინახავთ და განწყობაც გაგიუმჯობესდებათ. მუშაობის დროს ორიგინალური ფოტოკუბიკით საყვარელი სახეების ნახვით არაერთხელ გაიხარებთ.

Read more »

”დაკონსერვებული” მოგონებები

ზაფხული უკვე მიილია და ხავერდოვანი სეზონით ვცდილობთ მის გახანგრძლივებას. შემდეგ კი დადგება ძალიან გრძელი და ცივი ზამთარი. ამ დროს თუ დრო და ფინანსური მდგომარეობა გვაძლევს საშუალებას, "თბილ ქვეყნებში" გამგზავრება საუკეთესო ვარიანტია. იმათ კი, ვისაც ამის საშუალება არ აქვთ, ერთ-ერთი საიტი ზაფხულის `დაკონსერვებას~ ურჩევს.

დასასვენებლად გამგზავრებულებს, ალბათ ხშირად შეგიგროვებიათ ბევრი სამახსოვრო და ერთი შეხედვით, გამოუსადეგარი ნივთი. იქნება ეს სხვადასხვა ზომისა თუ ფორმის კენჭები, ნიჟარები, გირჩები, ყვავილები და სუვენირები, რომლებსაც გულმოდგინე ინახავთ. სწორედ მათი გამოყენებით საინტერესო და ორიგინალური ნივთების დამზადების ხერხებია საიტზე განთავსებული.

ყველაფერი ძალიან მარტივად კეთდება. აიღეთ რამდენიმე სხვადასხვა ზომის თავსახურიანი მინის ქილა და თქვენ მიერ შეგროვილი სამახსოვრო ნივთები, სურვილისამებრ ფოტოებიც. თავიდან გადაანაწილეთ სუვენირები თემატურად. დაჯგუფება სხვადასხვა მეთოდით შეიძლება: წლების, ქალაქების, ადგილების და მოვლენების მიხედვით, მთავარია, თითოეულ სუვენირთა ჯგუფს თავისი იდეა ჰქონდეს. მოიფიქრეთ სლოგანი ან მხიარული სათაური თითოეული ჯგუფისთვის.

გადაალაგეთ სუვენირები სხვადასხვა ქილაში, შეგიძლიათ გამოიყენოთ სპეციალური გასაფორმებელი ფერადი კენჭები და სხვა საშუალებები, ყველაფერი თქვენს ფანტაზიაზეა დამოკიდებული. საბოლოოდ, გარდა იმისა, რომ ნივთების გადალაგებისას კვლავ გაიხსენებთ სასიამოვნო მომენტებს, მიიღებთ ორიგინალურ სუვენირებსაც, რომლითაც თქვენი სახლის მორთვას შეძლებთ.

ყოველთვის, როცა გვერდით ჩაუვლით თქვენს ნახელავს, სასიამოვნო საზაფხულო-სამივლინებო განწყობით დაიმუხტებით და ერთფეროვანი სამუშაო დღეები არც ისე მოსაწყენად მოგეჩვენებათ.

Read more »