ახალ წელს მხიარულად რომ შევხვდეთ...

ახალი წელი ის დღესასწაულია, როცა ყველა რაღაც საოცრებას ელოდება და გულის სიღრმეში მაინც სჯერა, რომ თოვლის ბაბუა მოვა და ყველაზე სანუკვარ სურვილებს აუსრულებს. ყველა, დიდი თუ პატარა ოცნებობს, წელიწადში ერთხელ მაინც დაივიწყოს პრობლემები და ეს დღე განსაკუთრებულად გაატაროს.
ნათქვამია, ახალ წელს როგორც შეხვდები, ისე გაატარებ მთელ წელსო. ამიტომ, ახალი წლის ღამე ნათელ და დასამახსოვრებელ დღესასწაულად აქციეთ, ისეთად, ემოციები მთელ წელს რომ გაგყვეთ.
ახალგაზრდებს ახალი წლის გარეთ გატარება ურჩევნიათ, თუმცა მშობელთა უმრავლესობა ფიქრობს, რომ ახალ წელს მთელი ოჯახი ერთად უნდა შეხვდეს. თუმცა წინასწარ ნუ ჩაიქნევთ ხელს, თქვენ არ ხართ ერთადერთი, ვინც 12 საათზე სახლში უნდა იყოს, თქვენი მეგობრების უმრავლესობაც იმავე სიტუაციაშია. ამიტომ, დაგეგმეთ ისე, რომ ახალ წელს ოჯახის წევრებთან ერთად შეხვდეთ და გარეთ მერე გახვიდეთ.
გართობის ყველაზე კარგი ხერხი კარნავალია, ოღონდ მისი ხიბლი ბოლომდე უნდა შეინარჩუნოთ, აუცილებლად გაიკეთეთ ნიღბები და არ გაამხილოთ წინასწარ თქვენი პერსონაჟი. კონკრეტული პერსონაჟების მოფიქრება კი საკმაოდ მარტივია, მაგალითად, ადვილად შეგიძლიათ შექმნათ პეპის და ალადინის კოსტიუმები, ასევე კარლსონი, ”პროპელერს” რაც შეეხება, თქვენ ან რომელიმე თქვენს მეგობარს ალბათ ექნება სახლში ძველი და გამოუსადეგარი ”ვენტილიატორი”, რომელსაც ზუსტად ისეთი პროპელერი აქვს, როგორიც კარლსონს ”შეეფერება”.
მეორე და საკმაოდ კარგი ხერხია დღესასწაული კონკრეტულ სტილში. მოიფიქრეთ ერთი სტილი და წვეულება მთლიანად მას მოარგეთ. ოთახის დიზაინი, სხვადასხვა დეტალი, სანთლები, გადასაფარებლები _ ყველაფერი ამ სტილს უნდა შეესაბამებოდეს. არ დაგავიწყდეთ შესაბამისი მუსიკის წინასწარ შერჩევაც.
შეგიძლიათ ახალი წელი ქალაქგარეთ გაატაროთ, ეს ერთ-ერთი საუკეთესო ვარიანტია, მით უმეტეს, თუ ამინდიც გიწყობთ ხელს. შეიძლება წინასწარ დაიჭიროთ თადარიგი და სახლი იქირავოთ რამდენიმე დღით, თუმცა, უჩვეულოდ თბილ ამინდებს თუ გავითვალისწინებთ, არც კარავით წასვლა გაგიჭირდებათ.
გარდა კონკრეტული ადგილისა, სადაც შეხვდებით და გაატარებთ ახალი წლის ღამეს, მნიშვნელოვანია ამ დღის შინაარსობრივი დატვირთვაც. შემოგთავაზებთ რამდენიმე საინტერესო კონკურსს, რომლებიც შეგიძლიათ ყველგან და სხვადასხვა ინტერესის ხალხთან ერთად მოამზადოთ.
პირველი და ყველაზე სახალისოა ”საახალწლო ლატარია”. ჩაყარეთ ყუთში სხვადასხვა სახის პატარ-პატარა საჩუქრები, შემდეგ ქაღალდზე ჩამოწერეთ თითოეული საჩუქარი და მიანიჭეთ ნუმერაცია, შემდეგ თითოეული ციფრი დაწერეთ ქაღალდის ნაკუწებზე, მეორე მხარეს კი დავალება მიუწერეთ, მაგალითად _ ”იმღერე საახალწლო სიმღერა”, ”ცალი ფეხით მიირბინე კარიდან ფანჯრამდე”, ”იცეკვე” და ა.შ. დაკეცეთ ქაღალდები და ჩაყარეთ ყუთში ან ტომარაში. თამაშის თითოეული მონაწილე ამოიღებს ერთ მათგანს, შეასრულებს მასზე დაწერილ დავალებას და მიიღებს იმ საჩუქარს, რომლის ნომერიც ფურცლის მეორე მხარეს ეწერება.
საინტერესოა ასევე კონკურსი _ ”საახალწლო სურვილები”. თითოეული მონაწილე ასახელებს თავის საახალწლო სურვილს. ვინც 5 წამზე მეტხანს დაფიქრდება, ის გავარდება თამაშიდან. გაიმარჯვებს ის, ვინც ყველაზე დიდხანს დარჩება თამაშში. ეს თამაში უბრალოა და მარტივია, მაგრამ ძალიან სახალისო, რადგან გარდა იმისა, რომ გაიგებთ რა სურთ თქვენს მეგობრებს, ბევრი მხიარული და სასაცილო სურვილიც იქნება.
სურვილებზე კიდევ ერთი მარტივი თამაშის მომზადება შეიძლება _ ფურცელზე დაწერეთ ყველაზე მნიშვნელოვანი, რაც მოხდა გასულ წელს და ერთიც სურვილი, რასაც ამ წლისგან ელოდებით და რომლის შესრულება ყველაზე მეტად გინდათ. ჩაყარეთ ქაღალდები ყუთში და დაწებეთ. შეინახეთ საიმედო ადგილას და ერთი წლის შემდეგ გახსენით, ძალიან მხიარული და საინტერესო იქნება ამ სურვილების ერთი წლის შემდეგ წაკითხვა.
საინტერესოა მუსიკალური კონკურსიც_ ქაღალდის ნაკუწებზე დაწერეთ სიტყვები, ჩაყარეთ ყუთში და ამოიღეთ რიგრიგობით. უნდა იმღეროთ ის სიმღერა, რომელშიც ის სიტყვა იქნება მოხსენიებული, რომელიც შეგხვდებათ.
და ბოლოს, ”ცეკვა ქაღალდზე” _ იატაკზე დაალაგეთ ერთი ან ორი თაბახის ფურცელი, რომლებზეც მოცეკვავე წყვილმა წინასწარ შეჩეული სიმღერის დამთავრებამდე უნდა იცეკვოს ისე, რომ იატაკზე ფეხი არ დადგას. გაიმარჯვებს ის წყვილი, ვინც ყველაზე დიდხანს იცეკვებს.
კიდევ უამრავი სახალისო თამაშის მოფიქრება შეიძლება, მთავარია საყვარელი ადამიანები გვერდით და ცოტა ფანტაზია. ბედნიერ ახალ წელს გისურვებთ!..

როგორ და სად შევიძინოთ საახალწლო ნაძვის ხე

ახალ წლამდე სულ ცოტა დრო რჩება, ნაძვის ხე კი ბევრს თქვენგანს – ჯერაც არ შეუძენია. იმის გარკვევაში, თუ სად და რა ფასად შეიძლება კარგი ნაძვის ხის შეძენა, ჩვენი რჩევები დაგეხმარებათ.
პირველ რიგში, უნდა გადაწყვიტოთ, ხელოვნური ნაძვის შეძენა გსურთ თუ ბუნებრივის. მე ხელოვნურს გირჩევთ და საამისოდ რამდენიმე არგუმენტიც მაქვს _ ზოგადად იგი უფრო იაფი ჯდება, ვიდრე ყოველ წელს შეძენილი ახალი, ნამდვილი ნაძვი, იგი, მრავალ ახალ წელს გემსახურებათ. ასევე ბუნებრივისგან განსხვავებით, ხელოვნური ნაძვი უფრო "შეფოთლილია" და გაცილებით უფრო ლამაზად გამოიყურება. ნურც ეკოლოგიური საკითხი გამოგრჩებათ ყურადღებიდან _ თქვენი ახირების გამო ყოველწლიურად უამრავი ნაძვი იჩეხება და ზიანდება. თუ დაგარწმუნეთ, უკვე უშუალოდ რჩევებზე გადავალ:
ხელოვნური ნაძვის შეძენისას ყურადღება უნდა მიაქციოთ წიწვის ხარისხს, იგი ადვილად არ უნდა ძვრებოდეს ღეროს და ტოტებიც მყარი მავთულისა უნდა იყოს _ ყოველწლიურად დაკეცვისას რომ არ დატყდეს. ბათუმში ასეთი ნაძვის შეძენა რამდენიმე ადგილას შეიძლება: მაღაზია `სუპერიში~ ორი მეტრის სიგრძის ნაძვის ხე 244 ლარი ღირს, 1.5 მეტრის სიგრძის _ 65 ლარი. იმავე სიგრძის, მაგრამ უფრო დაბალი ხარისხის ნაძვი კი 49 ლარად იყიდება.
ხოფის ბაზარზე, უმეტესად, დაბალი ხარისხის ნაძვი შემხვდა _ შიგ ჩამონტაჟებული მანათობლებითა და ა.შ. სულ პატარა (30-40სმ) ნაძვები 3-8 ლარი ღირს, პატარა ნაძვები (ნახევარი და ერთი მეტრი) 100-170 ლარამდე ღირს, მაღალი ნაძვები, ორ მეტრომდე სიგრძისა, 135-255 ლარად იყიდება. `ბეტმენში~ ამ ნაძვს 200 ლარად შეიძენთ _ თუმცა აქვე დავამატებ, რომ ასეთ ნაძვებს ზედმეტად ხელოვნური, სქელი `წიწვები~ აქვთ და ტოტების სიმრავლითაც ვერ დაიკვეხნიან. უმჯობესია, შესახედაობით უფრო რეალისტური, წვრილწიწვიანი ნაძვი შეარჩიოთ
_ ასეთი ნაძვის ფასი (ნახევარი მეტრო) 50 ლარია, ორი მეტრო ნაძვის კი _ 150 ლარი.
საქართველოში ნაძვის მოჭრა აკრძალულია და ბაზარზე მხოლოდ ტოტებით აწყობილი ნაძვები იყიდება, თუმცა ზოგჯერ ასეთი ნაძვიც ხშირტოტებიანია. ჰოდა, თუ ასეთი ნაძვის ხე მოგივიდათ თვალში, აუცილებლად მიაქციეთ ყურადღება ტოტების დრეკადობას _ ნედლ ნაძვის ხის ტოტები იდრიკება და ადვილად არ ტყდება. საყურადღებოა წიწვების ფერიც, იგი ხასხასა მწვანე ფერისა უნდა იყოს და გადატეხისას, მძაფრ არომატს უნდა აფრქვევდეს. ბაზრობაზე ასეთი ნაძვის ფასიც მისი სიგრძის მიხედვით განისაზღვრება: 1მ. _ 10 ლარი, 1.5მ. _ 15-30 ლარი, 2.5მ. _ 40-50 ლარი.
ბუნებრივი ნაძვის ხის შეძენისას გასათვალისწინებელია გამძლეობაც. მაგალითად, კარგი გამძლეობით გამოირჩევა ფიჭვის ხე, ნაძვი კი მალე ხმება, წიწვები ცვივა და 2-3 დღეში კოხტად მორთული ცარიელი ტოტები შეგრჩებათ ხელში. ფიჭვისა და ნაძვის ხის გარჩევა, ტოტისა და წიწვის მიხედვით შეიძლება _ ამ უკანასკნელს უფრო მოკლე ტოტები და წვრილი წიწვები აქვს.
როცა ნაძვის ხეს მორთავთ, აუცილებლად გადაინახეთ რამდენიმე ახალნაყიდი სათამაშო, რომლებიც ოჯახის ყველა წევრმა ზუსტად 12 საათზე უნდა შეაბას ნაძვს და ყველაზე სანუკვარი სურვილები უნდა ჩაიფიქროს ამ დროს _ ამბობენ სურვილები წლის განმავლობაში აუცილებლად შესრულდებაო.

იდეალური საცივი

საახალწლო სუფრა ქართული ტრადიციული საცივის გარეშე წარმოუდგენელია, ამიტომაც, დღეს "იდეალური საცივის" რეცეპტს შემოგთავაზებთ _ მისი დამზადების წესებზე ქალბატონი მერი სურმანიძე გვესაუბრა.
ინდაური ან დედალი (აუცილებლად) მოხარშეთ თუჯის ან ემალის ქვაბში, შემდეგ წყლიდან ამოიღეთ, გააგრილეთ (თორემ ცხელი დაიშლება), დაჭერით ნაჭრებად და შეინახეთ. ქათმის ნახარშ, თბილ წყალში გახსენით წვრილად გატარებული ნახევარი კგ. ნიგოზი _ ნიგოზი უნდა იყოს ქართული, თეთრი და არა შავი, კერძმა ფერი რომ არ შეიცვალოს.
მანამ, სანამ ნიგოზს ნახარშში გაურევდეთ, ნიგოზს, გატარებისას, დაუმატეთ ერთი (არა სავსე) ჩ/კ ხმელი ქინძი, ხმელი სუნელი, ზაფრანა ანუ ყვითელი ყვავილი. ცალკე უნდა გაატაროთ ნივრის 4-5 კბილი და ერთი კონა ქინძი (სუნელები აუცილებლად ნიგვზის გატარების დროს უნდა ჩაამატოთ, თორემ მერე ჩაყრილი ცალკე ამოტივტივდება). შემდეგ ორივე მოათავსეთ სუფთა მარლაში, დაასველეთ ქათმის ნახარშ წვენში და ჩააწურეთ გატარებულ ნიგოზში.
ამის შემდეგ ნიგოზი მოათავსეთ თითბრის (მალიროვან) ქვაბში და მხოლოდ ამის შემდეგ, ფრთხილად დაასხით ნახარში სითხე. ურიეთ ნელა, სითხე უნდა მოზომოთ თვალით, დაასხით იმდენი, რომ საშუალო სისქის მასა მიიღოთ.
მარილი გემოვნებით...
ქალბატონი მერის რჩევით საცივს, ბევრი სუნელი არ უხდება, ნურც მწვანილს გადაამეტებთ, თორემ კერძი მომწვანო ფერს შეიძენს _ ასე რომ, ყველაფერში ზომიერება გმართებთ.
საცივში ზოგჯერ ხახვს ამატებენ, იგი ინდაურის ხარშვისას უნდა ჩაამატოთ წვენში, თუმცა ქალბატონი მერი საცივში ხახვს საერთოდ არ იყენებს.
როცა საცივის მასას მოამზადებთ, წვენში ჩაალაგეთ დაჭრილი ქათამი, ან შეგიძლიათ წვენი და ხორციც ცალ-ცალკე შეინახოთ და მხოლოდ სუფრაზე გატანისას გააერთიანოთ.
გემრიელად მიირთვით!

საახალწლო ვარსკვლავი – თქვენი ხელით

დღეს ბაზარზე ნაძვის ხის სათამაშოების დიდი არჩევანია, მაგრამ ყოველთვის შეიძლება რაიმე განსაკუთრებულისა და ორიგინალურის გაკეთება. დღეს შემოგთავაზებთ იდეას, რომელსაც ერთ-ერთ საიტზე გავეცანი. საახალწლო ვარსკვლავის შესაკერად დაგჭირდებათ 15-სმ-იანი კვადრატის ფორმის, ნებისმიერი ფერისა თუ ტექსტურის ქსოვილი (2 ც) ოქროსფერი ფერი ძაფი და ფერადი ბუსები.
ქსოვილზე ფანქრით მოხაზეთ ვარსკვლავის ან გულის ფორმა, შემდეგ ქსოვილის ორივე ნაჭერი დაადეთ ერთმანეთს და გამოჭერით ნახაზი, ნახევარი სანტიმეტრით იმაზე დიდი, ვიდე ნაძვის ხის სათამაშოს რეალური ზომა უნდა გამოვიდეს. შემდეგ ნემსითა და ძაფით შემოუარეთ ნახაზს და დატოვეთ ერთი სანტიმეტრის სიგრძის ნარღვევი. ამოატრიალეთ ვარსკვლავი ისე, რომ ნაკერი შიგნითა მხარეს აღმოჩნდეს და პატარა ნარღვევიდან მოათავსეთ შიგ ბამბა ისე, რომ იგი ყველა ქიმში თანაბრად გადანაწილდეს. შემდეგ ამოკემსეთ ვარსკვლავის დარჩენილი ნაწილიც და თან ჩააკერეთ ორად მოკეცილი რაიმე ბრჭყვიალა ზონარი, რომელიც საკიდის მაგივრობას გაწევს. როცა ბალიშისმაგვარ ვარსკვლავს მიიღებთ, ზედ რაიმე ორნამენტის სახით დააკერეთ ფერადი ბუსები და ყველაფერი მზადაა. ასეთი სათამაშო კარგი საჩუქარია ყველასთვის.
არ დაგავიწყდეთ, საახალწლო ვარსკვლავის დაკიდვისას აუცილებლად ჩაიფიქრეთ რაიმე სურვილი _ ახალი წლის განმავლობაში აუცილებლად აგისრულდებათ!

როგორ შევარჩიოთ საახალწლო სურსათი


ახალი წლის ღამეს ერთ-ერთი ყველაზე მნიშვნელოვანი ტრადიციული მაგიდაა. ამიტომ შევეცდები გირჩიოთ როგორ უნდა შეარჩიოთ სწორად ”საახაწლო სურსათი”.
საახალწლო მაგიდაზე მთავარი ადგილი გოჭს უკავია და როგორც ბაზრობაზე მითხრეს, მისი შეძენისას უპირველესად ყურადღება უნდა მივაქციოთ აქვს თუ არა ერთგვარი ბეჭედი, რაც ნიშნავს, რომ ლაბორატორიაში შემოწმებულია და ვარგისიანია. რაც შეეხება ხორცის გემოს, გამყიდველი ეთერ შანიძე ამბობს, რომ ყველაზე გემრიელი ხორცი შავ-ჭრელ გოჭს აქვს და მისი გამორჩევა ფერით შეგიძლიათ. ან დააკვირდით ჩლიქებზე შემორჩენილ ბეწვს, ის აუცილებლად შავი უნდა იყოს. ალბათ სწორედ ამ უპირატესობის გამო შავ-ჭრელი გოჭი დანარჩენებთან შედარებით 5-10 ლარით ძვირი ღირს. საერთოდ, კი, როგორც ქალბატონმა ეთერმა მითხრა, ჩოხატაურიდან ჩამოტანილი გოჭი ყველაზე გემრიელია.
რაც შეეხება ინდაურს, აქაც უპირველესად ბეჭედს უნდა დააკვირდეთ, თუ ის გადასული აქვს, ე.ი. ახალი არაა და რამდენიმე დღისაა. საერთოდ კი, ახალია თუ არა ინდაური, ადვილად მიხვდებით სუნით _ დასუნეთ კისერში და კურტუმოს ადგილას, ასევე გააჭრევინეთ გამყიდველს და დააკვირდით ღვიძლსაც, ახალი ინდაურის ღვიძლი თითქოს ანათებს, პრიალებს, ძველის კი მუქია. დააკვირდით ინდაურის ფერსაც, ჩაშავებული არ უნდა იყოს. თუ გინდათ ინდაურის ხორცი რბილი იყოს და მალე მოიხარშოს, შეძენისას ჩააჭირეთ ფრჩხილი ფრთის შუა ნაწილში, მოკეცვის ადგილას, ტყავზე, თუ რბილია და ჩაიჭრა, ე.ი ადვილად მოიხარშება.
საახალწლო სუფრის მნიშვნელოვანი ინგრედიენტებია ნიგოზი და თხილიც. ბაზრობაზე მირჩიეს, რომ წელს უხარისხო ნიგოზია და უკეთესია გარჩეულს თუ შევიძენთ. მიჩნეულია, რომ თეთრი ნიგოზი უფრო ხარისხიანი, თუმცა როგორც ბაზრობაზე მითხრეს, თეთრი კარგია ბაჟესთვის, ისე კი უფრო მუქი შეფრილობის ნიგოზს მეტი ცხიმი და ვიტამინი აქვს და მისი გამოყენება სხვა კერძებში უკეთესია. რაც შეეხება ე.წ. ”რუსულ” და ”კერკეტ” ნიგოზს, მას უფრო მეტი ცხიმი და ეთერზეთები აქვს და სამკურნალოდაც კი იყენებენ. თუ მაინც გასარჩევი ნიგვზის ყიდვას გადაწყვეტთ, კარგ ნიგოზს არ უნდა ჰქონდეს სიშავეები ადგილ-ადგილ და რა თქმა უნდა, ნასვრეტები. თუ მეტისმეტად მსუბუქია, ე.ი. ცარიელია, თუმცა არც მძიმე ნიშნავს ხარისხიანს, რადგან შეიძლება დამპალი იყოს და სწორედ ამიტომ იყოს მძიმე.
რაც შეეხება თხილს, თურმე პატარა თხილი უფრო გემრიელია და რაც უფრო დიდია თხილი, მით უფრო უგემურია და შეიძლება დიდ ნაჭუჭში პატარა გული იყოს.
ნიგოზისა და თხილის შემდეგ ტრადიციული გოზინაყისთვის თაფლის შეძენაღა დაგრჩათ. ამაზე ერთხელ უკვე ვისაუბრეთ. თუ ჭურჭლიდან მშრალი კოვზით ამოღებისას თაფლი რთულად შორდება კოვზს, ესე იგი ხარისხიანია. გარდა ამისა, ნამდვილი თაფლი კოვზით ამოღებისას იწელება და არ წყდება, წყალში ადვილად არ იხსნება, ბლანტია და ოდნავ მწარე გემო დაჰყვება.
საახალწლო სუფრა წარმოუდგენელია სხვადასხვაგვარი სასუსნავის გარეშე, რომელთა შორის ალბათ ყველაზე მნიშვნელოვანი ადგილი ჩურჩხელასა და ჩირს უკავია. ხარისხიანი ჩურჩხელა ელასტიური უნდა იყოს და ბადაგის ქვეშ უნდა ჩანდეს თხილი თუ ნიგოზი. თეთრი ან მოწითალო შეფერილობის ჩურჩხელა უკეთესია, რადგან ნამდვილად ბადაგშია ამოვლებული.
რაც შეეხება ჩირს, ბაზრობაზე მითხრეს, რომ ოდნავ თეთრი შეფერილობის, დაშაქრული ჩირი ყველაზე ხარისხიანია, დასრულებულია უკვე, არც წონაში მოიმატებს და გემრიელია. კარგი ჩირი უნდა იყოს საშუალო სირბილის და ბუნებრივი შეფერილობის, მაგარი ან გაშავებული ჩირი არ ვარგა, ეს ნიშნავს, რომ წყალი ან მტვერი აქვს მიღებული.

გაცივება რომ ავიცილოთ თავიდან

ზამთარიც დადგა და მიუხედვად უჩვეულო სითბოსი, გაციების რისკიც გაიზარდა. ყელის ტკივილი, მაღალი სიცხე და ხველა _ ჩვენი თუ არა, ოჯახის რომელიმე წევრის მეგზური მაინც ხდება თითქმის მთელი ზამთრის განმავლობაში. თან გაციება ისეთ დროს ”გვეწვევა”, მისთვის ნამდვილად რომ არ გვცალია, არც სახლში ყოფნის და ბოლომდე გამოჯანმრთელების საშუალებას გვაძლევს დატვირთული გრაფიკი და ვერც უეცრად მოსულ თოვლში ”ხელების ფათურისგან” ვიკავებთ თავს.
ოჯახის ექიმი, ნინო კვაჭაძე გვირჩევს, თუ როგორ ავიმაღლოთ იმუნიტეტი და თავიდან ვიცილოთ გაციება. `პირველ რიგში, უნდა მოერიდოთ ჩაკეტილ სივრცეს, ხშირად გაანიავეთ ოთახი, სადაც იმყოფებით. განსაკუთრებით აუცილებელია საძინებელი ოთახის განიავება. თუ ყოველდღიურად გიწევთ ხალხში ყოფნა, პროფილაქტიკის მიზნით შეიძლება ცხვირის ქვეშ, ნესტოებთან წაისვათ ”ოქსალინის მალამო”. ადგილებში, სადაც არის იმის საშიშროება, რომ შეიძლება რამე გადაგედოთ, აუცილებლად გამოიყენეთ ერთჯერადი ნიღაბი.~
წელს შემოდგომასა და ზამთარში უჩვეულოდ თბილი ამინდებია და ალბათ ბევრი ჩვენგანს ხშირად ესმის საყვედური მშობლისგან თბილად ჩაცმის თაობაზე. ექიმი ამბობს, რომ უნდა ჩავიცვათ ტემპერატურის და სეზონის მიხედვით _ ”ზოგიერთი მშობელი მეტისმეტად თბილად აცმევს ბავშვს, რადგან ფიქრობს, რომ ამით იცავს გაციებისგან. არადა, პირიქითაა, როცა ბევრი აცვია, ბავშვი ოფლიანდება და თუ ორპირ ქარში მოხვდა, გაცივდება.”
რაც შეეხება იმუნიტეტის გაძლიერებას, ამისთვის შეგიძლიათ გამოიყენოთ როგორც ფარმაკოლოგიური პრეპარატები, ასევე ხალხური მედიცინაც _ ”ერთი ლიმონის წვენი და 2 სუფრის კოვზი თაფლი აურიეთ ერთმანეთში და უზმოზე მიიღეთ ერთი სუფრის კოვზი. სასარგებლოა ნიგოზიც, დილით ორი-სამი ლებნის მიღება აძლეიერებს იმუნიტეტს და დადებითად მოქმედებს ნერვულ სისტემაზე. რაც შეეხება პრეპარატებს, შეგიძლიათ მიიღოთ ”იმუნორიცი” ორჯერ დღეში, ერთი თვის განმავლობაში, ასევე იმუნალი, როგორც წვეთებში, ისევე აბებში. ასე მომზადებული შეხვდებით ცივ ამინდებს. ეს პრეპარატები არ არის მავნებელი. ასევე, კარგია C ვიტამინის მიღებაც”.
თუ სურდო დაგეწყოთ, აუცილებლად მიიღეთ ბევრი თბილი სითხე (თბილი და არა ცხელი). აღმოჩნდა, რომ ამ დროს მავნებელია როგორც ზედმეტად ცივი, ასევე ცხელიც და არამარტო ყელისთვის, ამან შეიძლება საფრთხე შეუქმნას კუჭ-ნაწლავს. სასურველია მიიღოთ ლიმონიანი ჩაი, დაითბილოთ ფეხები და გაიკეთოთ ინგალაცია _ ცხელ წყალში ჩაყარეთ ცოტაოდენი სოდა, მარილი და დაამატეთ იოდი, გადაიფარეთ თავზე პირსახოცი და 2-3 წუთს იორთქლეთ. როგორც ექიმი ამბობს, ეს კარგი საშუალებაა ცხვირ-ხახის დაავადებებისთვის _ ”თუ გაცივდით, ნუ გახვალთ ქუჩაში, შეეცადეთ 2-3 დღეს სახლში დარჩეთ.”
თუ სურდო გართულდა და 2-3 დღის განმავლობაში სიცხემ არ დაიწია, აუცილებლად მიმართეთ ექიმს _ ”ნუ ენდობით თქვენს გამოცდილებას, ახლობლებსა თუ მეზობლებს, ამ დროს ექიმის კონსულტაცია აუცილებელია, ჩვენ შეიძლება რაღაც გამოგვეპაროს და ჩვენი დაუდევრობით საკუთარ თავს ზიანი მივაყენოთ” _ ამბობს ნინო კვაჭაძე.

ფეხსაცმლის მოვლა

სწორი მოვლა და შენახვა ფეხსაცმლის გამოყენების ვადას საგრძნობლად ახანგრძლივებს. სხვადასხვა მატერია სხვადასხვაგვარ მოვლას საჭიროებს, სწორედ ამაზე ვისაუბრებთ სტატიაში.
ზამშის ფეხსაცმლის გაწმენდისას აუცილებლად სპეციალური საშუალება და რეზინის ჯაგრისი უნდა გამოიყენოთ. ცხიმიანი ლაქების მოსაშორებლად კი სპეციალური ქიმიური საშუალება გამოიყენება. უკვე გაწმენდილ ფეხსაცმელს წაუსვით ზამშის საღებავი და გაშრობის შემდეგ მშრალი ჯაგრისით გაწმინდეთ.
ტყავის ფეხსაცმელიც გახდის შემდეგ რეზინის ჯაგრისით უნდა გაწმინდოთ, შემდეგ კი თხლად გადაუსვით ფეხსაცმლის კრემი. 3-5 წუთის შემდეგ ჩვეულებრივი ჯაგრისით ან ბეწვიანი ნაჭრით გაწმინდეთ. ფეხსაცმელი თუ გაქექილი ან დაზიანებულია, შესაბამისი ფერის ფეხსაცმლის საღებავი გადაუსვით.
ლაკირებული ტყავისგან დამზადებული ფეხსაცმელი სველი ტილოთი გაწმინდეთ, შემდეგ კი მშრალი ტილო დაასველეთ სელის ზეთში, გაწმინდეთ ლაკირებული ადგილები და სწრაფადვე გააპრიალეთ რბილი ქსოვილით. საერთოდ, ამ სახის ფეხსაცმელს განსაკუთრებული მოვლა სჭირდება, რადგან ვერ იტანს დაბალ ტემპერატურას. სახლიდან გასვლამდე 10 წუთით ადრე ჩაიცვით ფეხსაცმელი, ფეხის სითბო გადავა მასზე, სიცივეში თანდათან გაცივდება და არა მაშინვე, რაც ფეხსაცმლის სიცივისგან დაზიანებას გაცილებთ. ასევე, ამ მეთოდით ხელს შეუშლით ზედაპირზე ნახეთქების გაჩენასაც.
რაც შეეხება ხელოვნური მასალისგან დამზადებულ ფეხსაცმელს, მისი უპირატესობა ისაა, რომ იგი დიდხანს ინარჩუნებს სასიამოვნო იერსახეს და ადვილად იწმინდება. მისი გასუფთავება შესაძლებელია ოთახის ტემპერატურის წყლით და შემდეგ მშრალი ტილოთი.
საერთოდ კი, ყოველი ტარების შემდეგ ფეხსაცმელი აუცილებლად უნდა მოაწესრიგოთ. სველი ფეხსაცმელი ოთახის ტემპერატურაზე უნდა გააშროთ, გამათბობელი საშუალებებისგან მოშორებით, მოარიდეთ მზის პირდაპირ სხივებსაც. დახურული ფეხსაცმლის ჩაცმისას გამოიყენეთ ე.წ. ”კოვზი”, რათა არ დაზიანდეს ქუსლის ნაწილი. ფეხსაცმელს ქუსლზე დაჭერით ნუ გაიხდით, გაიხსნება და ძირი აძვრება.
გახსოვდეთ ისიც, რომ სეზონური ფეხსაცმლის გარანტირებული ვადა 30 დღეა და იწყება სეზონის დაწყების დღიდან. თუმცა, თუ ზემოთ ჩამოთვლილ რჩევებს გაითვალისწინებთ, ფეხსაცმლის მოხმარების ვადა საგრძნობლად გახანგრძლივდება.

მამაკაცი და სტილი

ადამიანების უმრავლესობას აქვს მოთხოვნილება, გამოიყურებოდეს კარგად, რათა მოსწონდეს გარშემომყოფებს და განსაკუთრებით საწინააღმდეგო სქესის წარმომადგენლებს. თუმცა, გემოვნებიანად და სტილურად ჩაცმა რატომღაც მარტო ქალების საქმედ მიაჩნიათ, არადა, ის მამაკაცებისთვისაც ძალიან მნიშვნელოვანია.
ხშირად ისმის კითხვა: როგორი მამაკაცები მოსწონთ ქალებს? გეტყვით, რომ ქალებს გემოვნებით ჩაცმული, სტილური მამაკაცები მოსწონთ და ამისთვის სულ არაა აუცილებელი მოდის ყველა სიახლეს მიჰყვეთ და ყველაფერი შეისყიდოთ. მამაკაცმა თავისი სტილი უნდა იპოვოს და ჰარმონიული იმიჯი შექმნას, უბრალოდ საჭიროა გქონდეთ ამის სურვილი და ცოტა ინფორმაციაც. შევეცდები ამ ინფორმაციის ნაწილი მოგაწოდოთ, დანარჩენი კი თქვენთვის მომინდვია.
მამაკაცის სამოსის სხვადასხვაგვარი სტილი არსებობს, თუმცა ყველაზე "გავრცელებული" სამი მათგანია და არ ღირს მათი აღრევა.
საქმიანი კლასიკური სტილი - პიჯაკი, კლასიკური შარვალი, პერანგი და ჰალსტუხი _ ეს საქმიანი კლასიკური სტილია. რა თქმა უნდა, ეს ყველაფერი უნდა იყოს სწორი ზომის და კარგად "იჯდეს" ფიგურაზე. პიჯაკის სახელო 1-1,5 სანტიმეტრით მოკლე უნდა იყოს პერანგის "მანჟეტზე". მამაკაცებს, რომლებსაც მოხდენილი ფიგურა აქვთ, მოუხდებათ "ჟილეტი", ასევე შარვალი დაბალი წელით. თუ თქვენ იდეალური ფიგურა არ გაქვთ, შარვალი უფრო მაღალწელიანი უნდა იყოს და სასურველია ზედმეტი ნაკეცების გარეშე.
casual სტილი - ეს სტილი უახლოვდება კლასიკურს, მაგრამ სამოსი უფრო თავისუფალი და მოსახერხებელია. სხვადასხვა სახის თხელი როლინგი, ე.წ. "კარდიგანები" (თხელი მოსაცმელი ჟაკეტი), ჯემპრი და მაისურები, შარვლები და რა თქმა უნდა, კლასიკური ჯინსი _ ავსებენ ამ სტილს. casual-ის საუკეთესო ვარიანტია: შარვალი+პერანგი+კარდიგანი+ე.წ. "მოკასინები".
სპორტული სტილი - სპორტულს ეძახიან სტილს, რომელშიც ყოველდღიურ გამოყენებისთვის ადაპტირებულია სპორტული სამოსი ან მისი ელემენტები. სპორტული სტილი უპირველეს ყოვლისა თავისუფლებაა, თუმცა აქაც არის ნიუანსები. მჭიდრო ჯინსები და მაისურები იმათთვისაა, ვისაც თავის სპორტულ აღნაგობაზე ყურადღების მიქცევა სურს, თავისუფალი ნივთები კი იმ ადამიანებისთვისაა, რომლებიც ცდილობენ გამოჩნდნენ ისეთები, როგორებიც არიან და ვისთვისაც მთავარი კომფორტია. სპორტული სტილის ყველაზე გავრცელებული ვარიანტია ფერადი პულოვერი V-ს ფორმის ყელით, მაისურები და კედები.
წარმატებებს გისურვებთ! მთავარია გახსოვდეთ, რომ ამ სტილებიდან კონკრეტული ელემენტების ერთმანეთთან სინთეზმა შეიძლება ცუდ შედეგამდე მიგიყვანოთ, ამიტომ შეეცადეთ ერთი მათგანი შეარჩიოთ.

ახალი წელი _ ახალი ცხოვრების დასაწყისი

`ალბათ არავის გაუკვირდება, თუ ვიტყვი, რომ ერთმანეთი ინტერნეტით გავიცანით... თავიდან ვმეგობრობდით, მერე ინტენსიურად დავიწყეთ მიმოწერა და მივხვდი, რომ ძალიან მივეჩვიე, მიუხედავად იმისა, რომ არ მყავდა ნანახი...~ _ ამბობს ნატა.

ერთმანეთს პირველად პირველ იანვარს შეხვდნენ და იმ დღესვე მიხვდნენ, რომ ერთმანეთი უყვარდათ... 2010 წლის პირველი დღე სიახლით დაიწყეს...

ყველაფერი მშვიდად და ტრადიციულად წარიმართა _ სამ თვეში ნიშნობა გაიმართა, მერე კი მალევე იქორწინეს. ქორწილისთვის კოტემ შავი შარვალ-კოსტიუმი შეარჩია თეთრი პერანგით, ნატამ კი საპატარძლო კაბის დიზაინი თვითონვე მოიფიქრა და შეაკერინა _ `სადა და უბრალო მინდოდა ყოფილიყო, ყოველგვარი ზედმეტი დატვირთვის გარეშე. თითოეული დეტალი თავად შევარჩიე~. ვარცხნილობა და მაკიაჟიც ბუნებრივი უნდა ყოფილიყო და არა სტანდარტული, ამიტომ ძალიან სადა ვარცხნილობა გაიკეთა და თეთრი ლენტით გააფორმა.

ცეკვა არც ნატამ და არც კოტემ არ იცოდნენ, მაგრამ ქორწილში მაინც აცეკვეს და როგორც ნატა ამბობს, ძალიან სასაცილოები იყვნენ. სამაგიეროდ, ორივე ძალიან კარგად მღერის და იმღერეს კიდეც. გარდა ამისა, ქორწილში ნატას მომღერალმა მეგობრებმა არაერთი სიმღერა შეასრულეს, რაც ქორწილს განსაკუთრებულ ეშხს მატებდა.

ნატას და კოტეს ბედნიერი ოჯახი აქვთ, ორივე მუშაობს, აქვთ საყვარელი საქმე და რაც მთავარია, უყვართ ერთმანეთი. სულ მალე კი, პირველ იანვარს, ერთი წელი შესრულდება, რაც ერთმანეთი პირველად ნახეს. რაც ყველაზე მთავარია, ამ ხნის განმავლობაში წყვილს არ უკამათია. წარმატებებს ვუსურვებთ მათ.

ნატა ფრუიძე და კოტე ბურჯანაძე

მთავარია ელეგანტურობა

არასასურველი კილოგრამები ქალის ყველაზე დიდი საფიქრალია. სწორედ ამიტომ, დიეტოლოგები და მოდური გამოცემები მუშაობენ ახალ-ახალ დიეტებზე, რომლებიც სულ უფრო და უფრო ზღუდავს რაციონში ცხიმს, მარილს, ხორცს, შაქარს, ტკბილეულს, ალკოჰოლს და ა.შ. შედეგად კი გემრიელ კერძებს მანდილოსნები უფრო და უფრო იშვიათად მიირთმევენ.
თუმცა, ელეგანტურობა სულაც არ გულისხმობს იდეალურ ფიგურას და ელეგანტურობისთვის სულაც არ გჭირდებათ იყოთ 90*60*90-ზე, მიუხედავად იმისა, რომ მსოფლიოში აღიარებული ყველა სტილური ქალი ასევე შედის მსოფლიოს ათ ყველაზე მოხდენილ ქალთა სიაში.
იდეალური ფიგურის არ ქონა არ უნდა გახდეს გარკვეული კომპლექსების საფუძველი. სტატისტიკის მიხედვით, ქალების მხოლოდ 5%-ს აქვს იდეალური ფიგურა. თუ თქვენ მათ შორის ხართ, ჩათვალეთ, რომ გაგიმართლათ, თუ არადა, ნურც მასზე ინაღვლებთ. მართალია, ფიგურის გამოსწორების ბევრი მეთოდი არსებობს, მაგრამ ის დიდ ძალას და ნებისყოფას მოითხოვენ, შედეგი კი არც ისე სრულყოფილია. ამ ყველაფერს ადვილად გამოასწორებთ სწორად შერჩეული სამოსით.
სასურველი შედეგის მისაღწევად ჯერ ობიექტურად შეაფასეთ თქვენი მონაცემები, უხეშად რომ ვთქვათ, დაადგინეთ სხეულის რომელი ნაწილი უნდა გამოჩნდეს და რომელი დაიფაროს. შემდეგ კი სწორად შეარჩიეთ სამოსი (ფერი, სილუეტი, სიგრძე, ხაზები, პროპორციები), ამაში ჩვენი რუბრიკის სტატიებიც გაგიწევთ ერთგვარ დახმარებას. ფიგურის შეცვლა ნამდვილად გაგიჭირდებათ, მაგრამ სწორად შერჩეული სამოსის დახმარებით შეძლებთ ვიზუალურად მაინც შეცვალოთ იგი. მთავარი საიდუმლო იმაშია, რომ სხეულისა და სამოსის პროპორციები უნდა ემთხვეოდეს ერთმანეთს. და ასევე, არ დაგავიწყდეთ ელეგანტურობის რამდენიმე "კანონი" _ ნუ ჩაიცმევთ დეკოლტეს და მინის ერთდროულად, ხაზი გაუსვით ან ლამაზ ფეხებს, ან მკერდს, ორივე ერთად ვულგარულად მიიჩნევა. ასევეა მაკიაჟიც _ თუ გინდათ თვალები გამოკვეთოთ, ტუჩები მსუბუქად შეიღებეთ და პირიქით.

scrapbooking _ ლამაზი და საჭირო ჰობი

scrapbooking _ ალბომების შექმნის ხელოვნებაა, უფრო სწორად ალბომის თითოეული გვერდის გაფორმების. ძირითადად ასეთ ალბომებში ოჯახის წევრების ფოტოსურათებს, ძვირფას წერილებს და მისალოც ბარათებს ინახავენ. რატომ დავვინტერესდი ამ ხელოვნებით: სულ ახლახან აღმოვაჩინე, რომ ძალიან ძნელია ლამაზი ფოტოალბომის შოვნა ფოტომაღაზიებში. ხშირად მსმენია, რომ საქორწინო ფოტოალბომები ძალიან ცუდი გაფორმებულია, საოჯახო ალბომები კი ზედმეტად მოსაწყენი. ჰოდა, ძვირფასო გოგონებო! ეს ხელსაქმე სწორედ მსგავსი "მნიშვნელოვანი წვრილმანებისთვისაა".
scrapbooking-ით ბევრი ადამიანია გატაცებული საზღვარგარეთ, ამას ისიც მოწმობს, რომ ინტერნეტში უამრავი ბლოგი, საიტი და ვიდეოგაკვეთილის შოვნა შეიძლება ამ თემაზე. ყველაზე დიდი არჩევანი საალბომე იდეებისა, შეგიძლიათ ყოუტუბე.ცომ-ზე დაძებნოთ.
თუ გსურთ, რომ სცრაპბოოკინგ-ით თქვენც დაკავდეთ, შემდეგი ინვენტარით უნდა შეიარაღდეთ: ძალიან ბევრი სხვადასხვა ფერის, სისქისა და ტექსტურის ქაღალდი, წვრილი ფერადი ბაფთები, ყველა სახის სტიკერი, წებო, სახაზავი, მაკრატელი და დიდი ნებისყოფა. დასაწყისისთვის სავსებით საკმარისია!

აი ლინკები, რომლებიც დაგეხმარებათ უკეთ გაერკვეთ ამ ხელოვნების არსში და შეიძება რამოდენიმე შესანიშნავი იდეაც მოგაწოდოთ:)





რა დავლიოთ პაემანზე

ალკოჰოლური სასმელი მხოლოდ მამაკაცებისთვის არ მოუგონიათ, მაგრამ ისიც ფაქტია, რომ ყველა სასმელი ქალისთვის, პირდაპირი მნიშვნელობით - მიუღებელია.
ეს რჩევები იმ მამაკაცებს გამოადგებათ, რომლებიც პაემანზე დაპატიჟებულ მანდილოსნებს ნატახტარის ლუდით უმასპინძლდებიან და ასევე იმ ქალებს, რომლებმაც არ იციან, რა დალიონ და მამაკაცის მიერ შეთავაზებულ "ნატახტარს" მიირთმევენ.
ძვირფასო ქალებო, როცა სასმელის არჩევაზე მიდგება ჯერი, დიდ ხანს ნუ იფიქრებთ, აირჩიეთ ისეთი სასმელი, რომელიც მარტივი დასალევი იქნება და თქვენს ხელშიც მაქსიმალურად მიმზიდველი და “ქალური” გამოჩნდება - ასეთია ყავის ან ხილის ლიქიორი, მარტინი, სხვადასხვა სახის კოქტეილი, მაგალითად - long icland-ი ან/და რომელიმე ქართული და უცხოური ბრენდის წითელი ღვინო.
თუ თქვენი შეხვედრა პირველი არ არის და უკვე ამ ადამიანს კარგად იცნობთ, შეგიძლიათ უფრო ძლიერი სასმელიც მიირთვათ, მაგალითად ჯინ-ტონიკი და არა ვისკი... ეცადეთ, თავი შეიკავოთ ზედმეტად მაგარი სასმელებისგან, მაგრამ თუ მაინც რაიმე "უფრო ძლიერი" გადაწყვიტეთ, შეუკვეთეთ არაყი ოღონდ არა "არგო" და სხვა მსგავსი. აუცილებლად კარგი და ძვირფასი არაყი შეუკვეთეთ, მაგალითად DANSKA ან SKYY, არაყი სასურველია ხილისა იყოს და თანაც ცოტა რაოდენობის _ ასეთ დროს მთავარია დაიცვათ ზომიერება, რომანტიკული საუბრისას თავი სალათში რომ არ ჩაგივარდეთ.
თუ თქვენი შეხვედრა უფრო თავისუფალ და მეგობრულ გარემოში დაიგეგმა, მაშინ შეგიძლიათ ნაკლებ ალკოჰოლური ან სპეციალურად ქალებისთვის განკუთვნილი, საერთოდ უალკოჰოლო ლუდი დალიოთ. გაითვალისწინეთ, რომ ლუდის სმით, მამაკაცის თვალში “მეგობრის ამპლუას” ვერ მოირგებთ და ვერც მის ბიუჯეტს გაუწევთ არსებით ეკონომიას. ასე რომ, თუ ამ სასმელის მოყვარული არ ბრძანდებით, სისულელეა მხოლოდ ხათრისთვის ხვრიპოთ იგი.

საუზმე საწოლში

თავიდანვე მინდა გითხრათ, რომ საუზმე საწოლში მხოლოდ ცოლ-ქმრისთვის არ არის მოგონილი, ასეთი სასიამოვნო საჩუქარი შეგიძლიათ თქვენი ოჯახის ნებისმიერ წევრს მოუმზადოთ და საამისოდ არანაირი განსაკუთრებული მიზეზი არ არის საჭირო. ეს ყურადღების სასიამოვნოდ და გემრიელად გამოხატვის ერთ-ერთი საუკეთესო საშუალებაა.
საწოლში საუზმის მისართმევად დაგჭირდებათ დიდი და მყარი ლანგარი, რომელზეც შეგიძლიათ ცხელი ტოსტი, ომლეტი და განწყობისთვის, პატარა ყვავილი მოათავსოთ.
ომლეტის დასამზადებლად (ოთხი პორციისთვის) ღრმა თასში კარგად აურიეთ 8ც კვერცხი, 1 ფინჯანი რძე (წყალიც შეიძლება), მარილი გემოვნებით და ცოტაც დაფქული შავი პილპილი ისე რომ, მასა არ მიიყვანოთ ამოფუვებამდე.
ტაფაზე გაადნეთ 2ს/კ კარაქი და ფრთხილად დაასხით კვერცხის მასა. როცა ომლეტი თითქმის გამოცხვება, ჩაახეხეთ შიგ ყველი.
სულ ბოლოს კი ორად მოკეცილ ომლეტს მოაყარეთ წვრილად დაჭრილი მწვანე ხახვი, გვერდით მიუდეთ კარაქში ან მშრალად გაფიცხებული პურის ტოსტები და ერთი ჭიქა ფორთოხლის წვენი.
მერწმუნეთ, ამ უგემრიელესი საუზმით დაწყებული დღე ძალიან ნათელი და ენერგიული იქნება, ასე რომ, ნუ დაგეზარებათ ძვირფასი ადამიანებისთვის მსგავსი საჩუქრის მომზადება.

მოსწავლის საგზალი

ყველას სურს, თავისი შვილი მხოლოდ სასარგებლო და უსაფრთხო საკვებით იკვებებოდეს, მაგრამ რა ვიღონოთ, როცა ბავშვი სკოლაშია და მთელი დღე ბუფეტში შეძენილ ფენოვანსა და გაზიან სასმელს მიირთმევს? ასეთი კვება ხომ წარმოუდგენლად დიდ ზიანს აყენებს ბავშვის ორგანიზმს.
სწორედ ამიტომ თქვენი პატარისთვის აუცილებლად უნდა შეიძინოთ მომცრო ზომის პლასტმასის კონტეინერი, რომლითაც ყოველდღე გაატანეთ სკოლაში თქვენს მომზადებულ პიურეს, კარტოფილის ღვეზელსა თუ სხვა ნებისმიერი სახის საკვებს. არ დაგავიწყდეთ, რომ პატარებს ძალიან უყვართ `ბონუს საკვები~, ანუ რაიმე სასუსნავი, ამიტომაც სკოლაში ბანანი, ვაშლი ან რამე სხვა ხილი გაატანეთ. კარგი იქნება, თუ პატარა თერმოსით კაკაოს ან ხილის კომპოტსაც გაატანთ _ დღეს სასკოლო ჩანთებს თერმოსის ჩასადები სპეციალური უბეებიც აქვს.
ერთადერთი პრობლემა, რასაც შეიძლება ბავშვის საგზალთან მიმართებაში წააწყდეთ, ისევ თქვენი პატარას კომპლექსები გახლავთ _ პატარებს ეთაკილებათ თანაკლასელების დასანახად სახლიდან წაღებული საკვების ჭამა, ამიტომ აუცილებლად დაუკავშირდით თქვენი შვილის ყველაზე ახლო თანაკლასელის მშობელს და შესთავაზეთ მას საგზლის მომზადების იდეა. შემდეგ კი შეგიძლიათ მშვიდად იყოთ _ პატარა მარტო არ იქნება და სახლიდან წაღებულ სადილს დიდი ნეტარებით დააგემოვნებს მეგობართან ერთად.
ნუ დაგავიწყდებათ კონტეინერის გაფორმებაც, საზღვარგარეთ სასკოლო ლანჩისთვის სპეციალური პატარა ჩანთები არსებობს სხვადასხვა ანიმაციური გმირების ნახატებით. თქვენც შეეცადეთ, საგზლის ყუთი კოხტად და ლამაზად გააფორმოთ _ საგზლის კონტეინერი საამაყო ჭურჭელი უნდა იყოს პატარა მოსწავლისთვის.

როგორი ქოლგა გვჭირდება

ბათუმში ძნელად მოიძებნება ადამიანი, ვინც ქოლგას განსაკუთრებულ მნიშვნელობას არ ანიჭებს. მიუხედავად თბილი და ზოგჯერ ცხელი ამინდებისა, როგორც მოდის სამყაროში ამბობენ, ქოლგა "აქტუალობას არც წელს დაკარგავს" _ სინოპტიკოსები მალე წვიმას და აცივებას გვპირდებიან. და თუ ქოლგა ჯერ არ შეგიძენიათ, დროა გაეშუროთ ბაზრობისკენ.
დაფიქრდით, როგორი ქოლგა გიხდება და გჭირდება. დიდ ქოლგებს, რომლებიც ბოლომდე არ იკეცება, აქვს უბრალო და საიმედო კონსტრუქცია, ამიტომ საკმაოდ გამძლეა. მავთულებს არ აქვს ზედმეტი მექანიზმები და გადატეხვები, ამიტომ ქოლგის გუმბათი უფრო უხეში და მრგვალია, რაც არამარტო ლამაზია, მოსახერხებელიცაა _ წვიმის წვეთები ადვილად ”ცვივა” ქვემოთ და ქოლგაც მალე შრება. ამ სახის ქოლგას ის ნაკლი აქვს, რომ ყოველთვის ხელში უნდა გეჭიროს და შენობაში კუთხეში დატოვება გიწევს, რის გამოც ხშირად გრჩება შენობაში.
რაც შეეხება დასაკეც ქოლგებს, მათი მთავარი პლუსი კომპაქტურობაა, პატარა ჩანთითაც კი შეგიძლიათ ტარება. თუმცა ამ ქოლგის დაზიანების შანსი უფრო დიდია, რადგან რაც მეტი ნაწილი აქვს ქოლგას, მით უფრო მეტი აქვს "სუსტი წერტილიც". დასაკეცი ქოლგები ერთმანეთისგან განსხვავდება გახსნის და დახურვის მეთოდით. არის ხელით სამართავი ნახევრად ავტომატური ქოლგები (სახელური ხელით იწევა და გუმბათი ღილაკზე ხელის დაჭერით), ავტომატური (მათ გასახსნელად ღილაკზე თითის დაჭერაც საკმარისია) და სრულიად ავტომატური, რომლებიც არამარტო იხსნება, არამედ იხურება ავტომატურად, ღილაკზე თითის დაჭერით.
თუ უკვე გადაწყვიტეთ, რა სახის ქოლგა გირჩევნიათ, შეძენისას რამდენიმე ნიუანსი გაითვალისწინეთ: რამდენჯერმე გახსენით და დახურეთ ქოლგა, რათა დარწმუნდეთ მექანიზმის გამართულობაში. გახსნისას შეამოწმეთ კარგად თუ არის გადაჭიმული ქსოვილი მავთულებზე. საერთოდ, დასაკეც ქოლგებს უფრო მსუბუქად აქვს შემოვლებული ქსოვილი, ვიდრე დიდ ქოლგებს, მაგრამ მეტისმეტად მსუბუქად მაინც არ უნდა იყოს _ წვიმის წვეთები არ დაიწურება და დროთა განმავლობაში ქსოვილიც უფრო გაიწელება. მავთულები, რომლებისგანაც დამზადებულია ქოლგის ერთგვარი "ჩონჩხი", უნდა იყოს ერთნაირი და "ჩონჩხსაც" სწორი ფორმა უნდა ჰქონდეს. ასევე, არ დაგავიწყდეთ შეამოწმოთ მყარადაა თუ არა დამაგრებული სახელურები. ბავშვის ქოლგას უსაფრთხოების მიზნით მავთულების დაბოლოებები პლასტმასის ან ხის ბურთულებით უნდა ჰქონდეს დაფარული.
იმისთვის, რომ ქოლგამ დიდხანს გემსახუროთ და ლამაზადაც გამოიყურებოდეს, საჭიროა კარგად მოუაროთ. გააშრეთ ბოლომდე გაშლილ მდგომარეობაში და არ დაკეცოთ სველი ქოლგა. ნურც ჩანთაში, მძიმე ნივთების ქვეშ მოათავსებთ, მავთულები გაიღუნება ან გადატყდება. აუცილებლობისას შეგიძლიათ ქოლგა გარეცხოთ კიდეც, ამისთვის ნახევრადდაკეცილ მდგომარეობაში ჩაალბეთ საპნიან წყალში, ცოტა ხნის შემდეგ კი გახსენით და სუფთა წყალი გადაავლეთ.
და ბოლოს, გაითვალისწინეთ ისიც, რომ უკეთესია ქოლგა არა ფერის, არამედ სტილის მიხედვით შეარჩიოთ _ საქმიან სამოსში გამოწყობილ ქალს ნაკლებად მოუხდება კოპლებიანი ქოლგა. უნდა გავითვალისწინოთ კანის ფერიც _ ფერმკრთალმა ქალებმა წითელი ან მუქი ვარდისფერი ქოლგა უნდა შეარჩიონ, მწვანე და ლურჯი კი უფრო აფერმკრთალებს კანს ვიზუალურად და ხაზს უსვამს ნაოჭებს.

ნაქსოვი ნივთების გარეცხვა

უკვე აცივდა და ნაქსოვი ნივთებიც სულ უფრო და უფრო აქტუალური გახდა. შესაბამისად, მათი რეცხვაც უფრო ხშირად გვიწევს. ჩვენმა საყვარელმა თბილმა სვიტერმა თუ კაშნემ ფორმა და ფერი რომ არ შეიცვალოს, რამდენიმე რჩევას მოგცემთ ნაქსოვი ნივთების რეცხვასთან დაკავშირებით.
ნაქსოვი ნივთების გასარეცხად უნდა გამოიყენოთ სარეცხი საშუალებები ტუტის მცირე შემცველობით. უკეთესია მათ ცივ წყალში თუ გარეცხავთ (არაუმეტეს 30 გრადუსისა). ნაქსოვი სამოსი უნდა გარეცხოთ ხელით. გარეცხვის შემდეგ გაავლეთ მინიმუმ 2-3-ჯერ, მანამ, სანამ წყალი არ გახდება გამჭვირვალე. ბოლო გავლებისას წყალში შეგიძლიათ დაამატოთ ძმარი ან ლიმონის წვენი. თუ სამოსის ეტიკეტზე ან საქსოვი ძაფის შეკვრაზე არის შესაბამისი ნიშნული, იგი შეგიძლიათ გარეცხოთ სარეცხ მანქანაშიც. იმისათვის, რომ არ დაზიანდეს ძაფის სტრუქტურა, უკეთესია სამოსი გარეცხვისას ნაჭრის ტომარაში მოათავსოთ.
რაც შეეხება კონკრეტულად შალის ნაწარმს, ისინი ფრთხილად და მხოლოდ სპეციალური სარეცხი საშუალებებით უნდა გავრეცხოთ, უბრალო ფხვნილები აზიანებენ და არღვევენ მგრძნობიარე ბოჭკოებს და ახდენენ სამოსის დეფორმირებას. შალის ძაფისგან ნაქსოვი სამოსიც ისევე უნდა გავრეცხოთ, როგორც შალის.
გარეცხილი სამოსი შეგიძლიათ გაწუროთ პირსახოცით, მაგრამ ნუ დაატრიალებთ. ნაქსოვი სამოსი უნდა გააშროთ გამობრუნებულ მდგომარეობაში წყლის შემწოვ ზედაპირზე (მაგალითად, პირსახოცი). არ შეიძლება ნაქსოვი ნივთების გაშრობა გამათბობელ საშუალებებთან ახლოს ან მზის პირდაპირი სხივების ქვეშ.

ქუდი და სტილი

მიუხედავად იმისა, რომ ჯერ ზამთრის სუსხი არ იგრძნობა, დეკემბერი დადგა და უკვე დროა, დავფიქრდეთ ქუდის შერჩევაზე. დღეს ქუდების დიდი არჩევანია და შეგიძლიათ ატაროთ ის მოდელი, რომელიც გსურთ, თუმცა არის ორი მთავარი ნიუანსი _ გარდა იმისა, რომ თბილად უნდა ვიყოთ, მნიშვნელოვანია ვიზუალური მხარეც. რამდენიმე, ყველაზე მოდური ქუდის შესახებ მოგაწვდით ინფორმაციას, რაც მის შერჩევაშიც დაგეხმარებათ.
ბერეტი _ რეტრო ტენდენციის გაგრძელებაა და შეიძლება ითქვას, რომ წელს ერთ-ერთი ყველაზე მოდურია. განსაკუთრებით უხდება გაშლილ ხვეულ თმას _ რომანტიკულია, ელეგანტური და ქალური.

ნაქსოვი ქუდები _ ორიგინალურ გოგონებს უხდებათ, რომლებიც განსაკუთრებულ დახვეწილობას უფრო ანიჭებენ უპირატესობას, ვიდრე მოდას. თუმცა, ბათუმში არსებულ ტენდენციას თუ გავითვალისწინებთ, ასეთი ქუდები უფრო მოდურია, ვიდრე ორიგინალური. ყველაზე მეტად ნაქსოვი ქუდი გაშლილ სწორ თმას უხდება. განსაკუთრებით პოპულარულია ერთფეროვანი ქუდები მსხვილი ნაქსოვით. ამ ქუდის პლუსია ის, რომ შეგიძლიათ თავად მოქსოვოთ და გექნებათ გარანტია, რომ ზუსტად ასეთი ქუდით ქუჩაში არავინ შეგხვდებათ. მაგრამ გახსოვდეთ, რომ ნაქსოვი ქუდები სპორტულ და თავისუფალ სტილს უხდება.

”უშანკა” _ ძველი რუსული ქუდების ახალგაზრდული ანალოგია. კარგად გვიცავს სიცივისგან და უფრო ახალგაზრდულ და უდარდელ იმიჯს გვიქმნის.

”გავროში” _ ფრანგები საკუთარ ისტორიას მეტისმეტად ფრთხილად ეკიდებიან და ხშირად მოდაშიც ვერ იცილებენ მის გავლენას. სწორედ პარიზმა კვლავ აქტუალური გახადა ქალის კეპები ”გავროშის” სტილში. ზამთარში ასეთი ქუდები უფრო თბილია და ასეთივე ფერები აქვს. მას იკეთებენ ერთ მხარეს გადაწეულ მდგომარეობაში და ეს სწორედ ის შემთხვევაა, როცა ასიმეტრიულობა ელეგანტურობას უდრის...

”febora” _ ეს არის მცირე ზომის შლაპის მაგვარი ქუდი, რომელიც ზამთარში თბილი ბეწვით ”იმოსება”. ძირითადად ატარებენ პალტოსთან და ქურთუკთან. ეს ქუდი სახის ყველა ტიპს უხდება.

ბეწვის ქუდი _ ბეწვეული მოდურია ნებისმიერ დროს. თუმცა, აქ სიფრთხილეა საჭირო, პირველ რიგში, ბეწვი ნატურალური უნდა იყოს. იგი ყველაზე მეტად ქურთუკს უხდება, რომელსაც სასურველია ბეწვეულის სახელო ან სხვა დანამატები ჰქონდეს. ასევე, საკმაოდ აქტუალურია ბეწვეულის ჩანთები, რომელიც მოუხდება ბეწვის ქუდს. შეეცადეთ, ბეწვეული არ ატაროთ წვიმაში. თუ დასველდა, არავითარ შემთხვევაში არ დავარცხნოთ და არც გამათბობელზე გააშროთ. ბეწვეული ოთახის ტემპერატურაზე უნდა გაშრეს.

ტყავის და ზამშის ქუდები _ ხშირად ამ ტიპის ქუდებს ბეწვის დანამატები აქვს, რაც საშუალებას გვაძლევს, ვატაროთ სხვადასხვა სახის ქურქთან ერთად. ამ ქუდების მთავარი პლუსი მათი პრაქტიკულობაა _ წვიმაში თუ ბათუმისთვის დამახასიათებელ სველ თოვლში, სხვა ქუდებისგან განსხვავებით, ისინი არ სველდებიან და არ კარგავენ ფორმას.

"ცოტა ხნის შემდეგ მივხვდი, რომ მეც მიყვარდა"

ერთმანეთი საერთო ნაცნობთან გაიცნეს. სიმპათიები მაშინვე გაჩნდა და მალე ვიტალი თამარს სიყვარულშიც გამოუტყდა _ "შევეჩვიეთ ერთმანეთს და მიყვარხარო რომ მითხრა, არ გამკვირვებია, თუმცა, მაინც დავფიქრდი და ცოტა ხნის შემდეგ მივხვდი, რომ მეც მიყვარდა".
თამარს სიურპრიზები უყვარს და ვიტალიც ხშირად ანებივრებდა. ერთხელაც, ბულვარში სასეირნოდ გასულები თხილნარში აღმოჩნდნენ და დრო ძალიან ლამაზად გაატარეს. სიყვარულის დღეს კი მოულოდნელად კაფეში დაპატიჟა, სადაც მეგობრები ელოდებონენ და გვიან ღამემდე იმხიარულეს _ "იმ დღეს ძალიან ბედნიერი ვიყავი, მიწაზე ფეხი არ დამიდგამს."
მერე იყო ტრადიციული ნიშნობა, ვიტალი თამარის მშობლებთან მივიდა და საყვარელი ადამიანის ხელი სთხოვა. საქორწინო სამზადისი მალევე დაიწყო, თამარმა თეთრი საპატარძლო კაბა შეარჩია, დეკოლტეთი და გიპიურით გაფორმებული, წელზე კი დიდი ბანტი ეკეთა. შესაბამისი ვარცხნილობაც თვითონ მოიფიქრა. ვიტალიმ ტრადიციულ შავ შარვალ-კოსტიუმს და თეთრ პერანგს მიანიჭა უპირატესობა. თეთრსა და ოქროსფერში იყო გადაწყვეტილი და ცოცხალი ყვავილებით გაფორმებული ნეფე-პატარძლის კუთხე, რომლის დიზაინიც დიზაინერის დახმარებით თამარმა შეარჩია.
რადგან ცეკვა კარგად არც ერთმა იცოდა, გადაწყვიტეს, წინასწარ მომზადებულიყვნენ და გარდა ტრადიციული დაისისა, ტანგოც იცეკვეს, რომელიც დამოუკიდებლად, ვიდეორგოლის დახმარებით შეისწავლეს.


ქორწილი ტრადიციების სრული დაცვით გაიმართა. პატარძალს სახლში მიაკითხეს და იქედან წამოიყვანეს, მერე ჯვარი დაიწერეს ბენზეში, თამარის ეკლესიაში.
დარბაზში წყვილს პატარა გოგო და ბიჭი შეუძღვა, რომლებიც წინ ვარდის ფურცლებს უფენდნენ. წყვილმა ჯერ დაისი იცეკვა, შემდეგ კი რამდენიმე დღეში ნასწავლი ცეცხლოვანი ტანგო, _ დარბაზში ფეიერვერკიც ენთო და დანამდვილებით შეიძლება ითქვას, რომ ტანგო მართლაც ცეცხლოვანი იყო.
ქორწილი ლამაზი და საინტერესო გამოვიდა, მეორე დღეს კი ტრადიციულად, ტორტი გაჭრეს და "სადილიც გახსნეს".

ვიტალი მახარაძე და თამარ ფარტენაძე

როგორ დავზოგოთ ფული

ფულის ფლანგვა, როგორც წესი, ქალების პრობლემად მიიჩნევა. ამიტომაც დღევანდელი რჩევები "მფლანგველი ქალებისთვისაა”.
ხელფასის აღებამდე აუცილებლად გააკეთეთ მთელი თვის შესყიდვების სია და თანხის აღების შემდეგ, მაქსიმალურად შეეცადეთ, არ გადაუხვიოთ მას.
ყველა ქალს უნდა ჰქონდეს გარდერობში ცნობილი მარკების ტანსაცმელი, მაგრამ ყოველდღიური ცხოვრებისთვის სამოსი შეგიძლიათ უფრო “უბრალო” მაღაზიებში შეიძინოთ, ისეთებში როგორიცაა: BTM-(ხელვაჩაურში), კ.გამსახურდიას (ძველი ლენინის) ქუჩის #20-ში არსებულ მაღაზია “ანგელოზში”. სპორტული “აღჭურვილობის” მოყვარულებმა შეგიძლიათ დ.თავდადებულის ქ. #46-ში არსებული გერმანული მაღაზია `დიადორა” მოინახულოთ. ფულის დასაზოგად კარგი ვარიანტია ქსოვაც. გარდა იმისა, რომ ეს ხელსაქმე ნერვებს ამშვიდებს, საკმოდ სერიოზულ ეკონომიასაც გააკეთებთ.
ჩაინიშნეთ ან უბრალოდ დაიმახსოვრეთ, დღის განმავლობაში ნანახი ის მაღაზიები, რომელთა ვიტრინებზეც ყველა ქალის საყვარელი აბრა _ “SALE”-ია გამოკრული. თუ სადმე ძალიან ლამაზ და ძვირფას ნივთს გადაეყარეთ, ნუ იჩქარებთ, აუცილებლად მოძებნეთ იგი ონლაინმაღაზიებში, ასე შესაძლოა სამჯერ უფრო იაფად შეიძინოთ.
დილით აუცილებლად მიითვირთ მსუყე საუზმე და სახლიდან გასულმა პატარა კონტეინერით აუცილებლად გაიყოლეთ საგზალი. ნაცვლად, უგემურად წახემსებული ჰამბურგერისა და ფენოვანისა, “პერერივზე”, სახლში დამზადებულ, უსაფრთხო საკვებს მიირთმევთ, რითაც მთელი თვის განმავლობაში სოლიდურ თანხასაც დაზოგავთ.
იარეთ იმ კაფეებში, სადაც “მიწიერი” ფასებია და სადაც თავს დაჯერებულად იგრძნობთ. “ვიპ პრესტიჟულ” კაფეებში, ნათხოვარი ნოუთბუქით ჯდომა, მარტო იმიტომ, რომ იქ უფასო ინტერნეტია, ცოტა უხერხულია, ამიტომ თავი შეიკავეთ ხუთლარიანი ყავის სმისგან.
მაქსიმალურად ეცადეთ, არ დაახურდავოთ “დიდი ფული/კუპიურა”, ხურდები კი დიდ ფულში გადაცვალოთ –ერთიდან ხუთ ლარამდე კუპიურები ისე შემოგეხარჯებათ, რომ ვერც კი ვხვდებით, სად და როგორ გაქრა ის.
და რა თქმა უნდა, გაუფრხილდით ელექტროენერგიას _ როცა სადმე მიდიხართ, ყველაფერი გამორთეთ.
ბოლოს კი რამდენიმე “მითი” ფულის შესახებ, რომლებიც ზოგჯერ ნამდვილად ამართლებს და იქნებ თქვენც გესინჯათ _ ქუჩაში მოძეული ხურდა არ დახარჯოთ და სანამ იგი საფულეში გექნებათ, ფული არ დაგელევათ; ფულის ნაწილი სახლში უნდა შეინახოთ _ ფული, ფულს იზიდავს. ასევე გაუფრთხილდით კუპიურებს, მათ კარგი მოპყრობა უყვართ – ამბობენ, რომ როცა ფულს არ კუჭავთ და არ ხევთ, ისინი საგრძნობლად მრავლდებიან თქვენს საფულეში.

რამდენიმე რჩევა სუნამოს შესახებ

სუნამოს მაგიურ თვისებებზე აღარ მოვყვები და მისი მოხმარების რამდენიმე საიდუმლოს გაგაცნობთ. ზოგი მათგანი "ICI PARIS"-ის კონსულტანტმა, ნანა ჟორჟაძემ გამანდო, ზოგსაც კი სხვადასხვა ვებ-გვერდზე გავეცანი.
თურმე სუნამო მხოლოდ აბაზანის შემდეგ უნდა დაისხათ, სუფთა კანი უკეთ იკრავს სუნს და მერე უფრო დიდ ხანს აირეკლავს მას.
სუნამოს სურნელი რომ უფრო მდგრადი იყოს, იგი უნდა წაისვათ იმ ადგილებში, სადაც ვენები გადის _ მაჯა, იდაყვი, კისერი, ყურის ძირებთან, საფეთქელი, საძილე არტერია, ყელი და მხრები. კანი ამ ადგილებში უფრო თბილია და გარდა სუნის ხანგრძლივობისა, სუნამოს არომატი ბოლომდე იხსნება.
მაშინ, როცა სუნამოს ტანსაცმელზე ასხამთ, გახსოვდეთ, რომ სუნამო ნატურალურ ქსოვილებზე უფრო უკეთ ნარჩუნდება და არც მისი სუნი იცვლება. შალისა და ბეწვეულის სამოსი სუნს წლობით ინარჩუნებს. სუნამომ ღია ფერის სამოსზე შეიძლება ლაქები დატოვოს, ამიტომ იგი სამოსის შიგნიდან უნდა დაასხათ, ნაკერებში.
ყველა ქალმა იცის, რომ დაუშვებელია სუნამოების შერევა, მაგრამ სამწუხაროდ სურნელზე ზეგავლენას უბრალო დეზოდორანტიც ახდენს. ამიტომ, თუ გინდათ, რომ თქვენი სუნამოს თავბრუდამხვევი არომატი უბრალო გამვლელებსაც კი აჯადოვებდეს, შეარჩიეთ რაც შეიძლება ნაკლებარომატული დეზოდორანტი.
რაც შეეხება სუნამოს შენახვას, `იგი ბნელ და გრილ ადგილას, თავდახურული უნდა შეინახოთ _ სუნამოს, რომელსაც მზის სხივი ხვდება, კეთილსურნელებას კარგავს~ _ გვითხრა ნანა ჟორჟაძემ.

გურმანის საჩუქარი

თუკი თქვენ გყავთ მეგობარი, რომელსაც ძალიან უყვარს გემრიელი კერძები და სასუსნავები და სულ მალე მას დაბადების დღე ან რამე სხვა სახის დღესასწაული აქვს, მაშინ ეს სტატია სწორედ თქვენზეა ზედგამოჭრილი.
ადამიანებს უხარიათ, როცა მათ რამე გემრიელს ჩუქნიან, განსაკუთრებით კი თუ ეს ტკბილეული თქვენ მიერაა დამზადებული.
თქვენ შეგიძლიათ გამოაცხოთ ორცხობილა ან ნამცხვარი, მაგალითად ვაშლის. მის მოსამზადებლად მიქსერით ათქვიფეთ 3 ც კვერცხი, ნელ-ნელა ჩააყარეთ შიგ ერთი ჭიქა შაქარი, შემდეგ გამორთეთ მიქსერი და დაშაქრული კვერცხის მასაში ჩააყარეთ ერთი ჭიქა ფქვილი და კოვზით ამოურიეთ. არ დაგავიწყდეთ, ცოტაოდენი ვანილის ჩამატებაც. აიღეთ ღმა ფორმა, თუ ის არ გაქვთ, პატარა რკინის თასი, წაუსვით შიგნით ზეთი და ჩაასხით შიგ ცომი, რომელშიც ჩაყარეთ დაჭრილი ვაშლი. ნამცხვარი დაახლოებით 20 წუთში გამოცხვება, თუმცა შიგ ჩაყრილი ვაშლის გამო იგი დიდად არ ამოფუვდება, სამაგიეროდ უფრო გემრიელი იქნება ვიდრე, მხოლოდ თავზე მოყრილი ვაშლებით იქნებოდა (ეს ნამცხვარი მეორე დღეს უფრო გემრიელია).
არ დაგავიწყდეთ, ყველაზე მნიშვნელოვანი _ საჩუქრის გაფორმება. იგი აუცილებლად კოხტად სუფთად და მადისაღმძვრელად უნდა გამოიყურებოდეს, რაშიც ლამაზი ჭურჭელი და სადღესასწაულო ბაფთები დაგეხმარებათ.
გარდა ამისა, შეგიძლიათ ნამცხვარს ერთი ბოთლი სახლის ღვინოც დაურთოთ, რომელიც ლამაზ ბოთლში იქნება ჩასხმული. "სასაჩუქრე" ბოთლები და სხვა სახის ქილები მაღაზია `სუპერში~ შეიძლება შეიძინოთ. ბოთლზე კი შეგიძლიათ იუბილარისადმი მისალოცი ტექსტი მიაწებოთ.
კარგი იქნება თუ ამ ყველაფერთან ერთად რომელიმე კარგი ხარისხის შოკოლადითაც დაატკბობთ იუბილარს. სასაჩუქრე შოკოლადს ქაღალდი შემოაცალეთ და მხოლოდ ფოლგა დაუტოვეთ, შემდეგ კი ლამაზ ქაღალდში (წიგნებზე გადასაკრავ) გაახვიეთ, ბაფთა დააბნიეთ და მზადაა.
მერწმუნეთ თქვენს მეგობარს ასეთი საჩუქრი უფრო გაუხარდება, ვიდრე ნებისმიერი იარლიყიანი ნივთი. მართლაც, რა უნდა იყოს იმ საჩუქარზე უფრო კარგი, რომელიც იჭმევა!

როგორ დავზოგოთ ელექტროენერგია

თითქმის ყველა ოჯახი შიშით ელოდება იმ დღეს, როდესაც `შუქის ქვითარი~ მოაქვთ სახლში. იმისთვის, რომ სახლში ენერგორესურსების ხარჯვა შეამციროთ, შემდეგი რჩევები უნდა გაითვალისწინოთ. რჩევები `ენერგოეფექტურობის ცენტრი, საქართველოს~ პროექტის `მწვანე ავტობუსში~ მოვისმინე და უფრო ზუსტი ინფორმაციისთვის, მათი ბუკლეტები დავიხმარე.
თურმე ძალიან დიდი მნიშვნელობა აქვს განათების სისტემებს _ თუ ვარვარა ნათურებს ენერგოდამზოგავი ნათურებით ჩაანაცვლებთ, ელექტროენერგიის მოხმარება 50-70%-ით შემცირდება. რა თქმა უნდა, არ უნდა დაგავიწყდეთ შუქის ჩაქრობა იმ ოთახებში, რომლებშიც არ იმყოფებით;
კონდიციონერის სიმძლავრე, ისევე, როგორც გათბობის სისტემების სიმძლავრე, გასათბობი ფართობის მიხედვით უნდა შეარჩიოთ; კონდიციონერის ჩართვისას ნუ დააყენებთ თერმოსტატის ტემპერატურას 24 გრადუსზე ქვემოთ, ამით ელექტროენერგია დაიზოგება;
მაცივრის ტევადობა აირჩიეთ მოთხოვნილების შესაბამისად. მაცივარი უნდა მოათავსოთ სითბოს წყაროდან მოშორებით და აუცილებლად გაწმინდოთ საყინულე, როცა ყინულის სისქე მიაღწევს 3 მმ-ს, ამით ენერგიის 30%ს დაზოგავთ. ასევე არ უნდა შეინახოთ მაცივარში ცხელი საჭმელი და არც მაცივრის კარი უნდა დატოვოთ ღია _ თურმე ესეც დიდ ზეგავლენას ახდენს ენერგიის წვაზე;
სარეცხი მანქანა უნდა ამუშაოთ სრული დატვირთვით. ეცადეთ, გამოიყენოთ დაბალტემპერატურიანი პროგრამები. რეგულარულად უნდა გაიწმინდოს სარეცხი მანქანის ფილტრი, ელექტროენერგიის მოხმარებას ამითაც შეამცირებთ;
ღამით და სახლის დატოვების შემთხვევაში ქსელიდან უნდა გამორთოთ აუდიო-ვიდეო ტექნიკა. ერთი ტელევიზორი მოლოდინის რეჟიმში (ეკრანზე გამოსახულების გარეშე და ანთებული მართვის სისტემით _ ანუ ანთებული პატარა, წითელი ნათურით) მოიხმარს ნორმალური მუშაობის დროს საჭირო ენერგიის 15%-ს.
საკუთარი გამოცდილებიდან გეტყვით, რომ დაზოგვის ეს ხერხები ძალიან ეფექტურია, მას შემდეგ, რაც უბრალო ნათურები, ენერგოდამზოგავი, სპირალისებრი ნათურებით ჩავანაცვლე, ელექტროენერგიის გადასახადი საგრძნობლად შემცირდა.

როგორ მოვაწყოთ საძინებელი იაფად და გემოვნებით

საძინებელი ყველაზე მაგიური და განსაკუთრებული ადგილია სახლში, აქ აუცილებლად კომფორტულად და მშვიდად უნდა გრძნობდეთ თავს. ჩვენ რამდენიმე მარტივ რჩევას შემოგთავაზებთ, რომლებიც ოთახის გემოვნებით გაფორმებაში დაგეხმარებათ.
დეკორაციული და სურნელოვანი სანთლები არამარტო მყუდრო გარემოს შექმნიან თქვენს საძინებელში, ისინი განტვირთვაშიც დაგეხმარებიან _ მათი შეძენა "სუპერში", "გუდვილსა" და "ჯორჯიტას" სუპერმარკეტშია შესაძლებელი (ფასი _ ერთიდან 25 ლარამდე);
საძინებელში რამდენიმე სახასიათო ნივთი _ ორიგინალური სურათები, ნახატები, განსაკუთრებული სათამაშოები და ა.შ. _ ხაზს გაუსვამს ოთახის პერსონალურობას;
განათება საძინებელში არ უნდა იყოს ზედმეტად კაშკაშა, საწოლში წიგნის საკითხავად ან უბრალოდ დაბალი განათებისთვის, პატარა ელექტროლამფები უნდა შეიძინოთ, რომლებიც საძინებელში არსებული, რომელიმე ავეჯის ტექსტურს უნდა შეეფერებოდეს...
ფარდებს რაც შეეხება, ინტერნეტში წავიკითხე, რომ ახლა დიზაინერები უპირატესობას ჭერთან ახლოს დაკიდულ ფარდებს ანიჭებენ, რომლებიც იატაკს სწვდება. ასეთი ფარდის საზღვრები ფანჯრის სისქეს უნდა აღემატებოდეს _ ფარდები ფანჯრის კიდეებამდე უნდა იყოს გახსნილი, რაც განსაკუთრებულ, კლასიკურ ეფექტს შესძენს ოთახს;
თუ საძინებელში სიცარიელეს გრძნობთ, არადა, ფერწერული ტილოების დაკიდება ძვირი გიჯდებათ, ან უბრალოდ სხვა მიზეზის გამო არ გნებავთ _ აჯობებს სარკეები დაკიდოთ... სასურველია ისინი რაიმე ლამაზ ჩარჩოში ჩასვათ. გარდა ოთახის ვიზუალურად გადიდებისა, ეს შესანიშნავი დიზაინერული შტრიხი იქნება თქვენი საძინებლისთვის.

დეკუპაჟი – დიზაინერული ხრიკი

დეკუპაჟი, ნივთების გალამაზების ძალიან ძველი ტექნიკაა, მას ჯერ კიდევ მე-17 საუკუნეში ავეჯის გასაფორმებლად იყენებდნენ გერმანიაში. დღეს ამ ტექნიკით შეგიძლიათ თითქმის ყველანაირი მოსაწყენი ნივთი გააფორმოთ, იქნება ეს მაგიდა, ჭურჭელი თუ სხვა საყოფაცხოვრებო დანიშნულების ნივთი.
დეკუპაჟი ერთგვარი აპლიკაციაა, მის შესაქმნელად სასურველი ორნამენტი ან ფიგურა,ქსოვილიდან, ქაღალდის ხელსახოცისგან, უბრალო ფურცლისა და ფოტოქაღალდიდანაც შეგიძლიათ გამოჭრათ, შემდეგ იგი სხვადასხვა სახის ავეჯსა თუ აქსესუარზე უნდა დააწებოთ და ზემოდან ლაქი გადაუსვათ. ოღონდ ორნამენტი კონტექსტიდან ამოვარდნილი რომ არ ჩანდეს, სურათს აკრილის საღებავით უნდა მიახატოთ კონტურები და დაბოლოებები.
დეკუპაჟის მოყვარულთა ფანგვერდზე - prodecoupage.com - ზე წავიკითხე, რომ ამოპრინტერებულ ქაღალდს, დაწებებამდე თმის ლაქი უნდა შეასხათ. ფოტოსურათს ჯერ ზედაპირზე (გამოსახულების მხარეს) უნდა წაუსვათ ლაქი, გაშრობის შემდეგ კი წყალში დაასველოთ და ფრთხილად მოაშოროთ ქვედა (თეთრი) მხარე. დეკუპაჟისთვის ხშირად იყენებენ მისალოც ბარათებს – მათი მომზადება ყველაზე ადვილია – დაასველეთ თითი წყალში და გადაუსვით ბარათს უკანა მხარეს.
ასევე ძალიან მნიშვნელოვანია, იმ ზედაპირის დამუშავება, რომელზეც აწებებთ სურათს, მაგალითად, შუშა და ფაიფური კარგად უნდა გაწმინდოთ სპირტით ან ძმრით. ხის ნივთების ზედაპირი კი, დაწებებამდე უნდა გახეხოთ და თუ არ დაგეზარებათ, აკრილითაც შეღებეთ.
იმედია, დაგაინტერესათ დეკორირების ამ ხერხმა და თქვენც შექმნით რაიმე ორიგინალურ და ძალიან ლამაზ დეკუპაჟს.

ორცხობილა ჯემით

ინსტრუქცია ჯემიანი ორცხობილის დასამზადებლად ირმა სურმანიძემ მოგვაწოდა.
კარგად ათქვიფეთ 2ც კვერცხი და ყავის ფინჯნით, ნელ-ნელა გაურიეთ მასში ზეთი. შემდეგ ჩაამატეთ ერთი შეკვრა, დარბილებული მარგარინი, 1 ჭიქა შაქართან ერთად და ამოიყვანეთ მიქსერით, ჩაამატეთ შიგ ვანილის ფხვნილი (მთელი შეკვრა), ერთი სუფრის კოვზი კარგი ხარისხის არაყი და სულ ბოლოს ფქვილი, იმდენი, რამდენსაც შეიზელს. ცომი ძალიან რბილი უნდა იყოს და მისგან პატარა ბურთულები უნდა გამოძერწოთ, რომელსაც თავზე პატარა ორმოები გაუკეთეთ და შიგ ნებისმიერი ხილის ჯემი მოათავსეთ.
ორცხობილა საკმაოდ მალე ცხვება, ამიტომ ყურადღებით იყავით, როგორც კი შეწითლდება, გამოიღეთ ისინი ღუმელიდან და ღრმა ვაზაზე დაალაგეთ.

რა არის სიზმარი?

ალბათ ხშირად გაგღვიძებიათ ბედნიერს და შემდეგ გული დაგწყვეტიათ, რომ ეს მხოლოდ სიზმარი იყო. ან შეშფოთებული წამოვარდნილხართ საწოლიდან და მერე გაგხარებიათ, რომ ესეც სიზმარი იყო. ან იქნებ თქვენ სულაც ის ადამიანი ხართ, ვინც ამტკიცებეს, რომ სიზმრს ვერ ხედავს.
რა არის სიზმარი, როდის და რატომ ვხედავთ მას, შეიძლება თუ არა სიზმრების კონტროლი... ამ და სხვა კითხვებზე ფიზიოლოგი, თამარ ასანიძე გვპასუხობს:
"ძილის დროს აღინიშნება პასიური და აქტიური ფაზები. ძილის სტადიები შეიძლება დავყოთ ხუთ ფაზად. ადამიანი სიზმარს მხოლოდ მეხუთე ფაზაში ხედავს, ანუ რემძილსაც (თვალების სწრაფ მოძრაობა) უწოდებენ. ამ დროს ტვინი იმდენად აქტიურია, რომ შეიძლება ღვიძილსაც კი შევადაროთ. რემძილის დროს ხმაურზე შეიძლება არ გაგეღვიძოთ, მაგრამ თუ ვინმემ თქვენი სახელი ახსენა, გაგეღვიძებათ და მთელ სიზმარს დალაგებულად მოყვებით".
იმიაზე, თუ რა არის სიზმარი, კამათობდნენ ადრე და კამათობენ ახლა, თუმცა ზუსტი, პასუხი დღემდე არ არსებობს _ "ამბობენ, რომ სიზმარი ისაა, რაზეც გვიფიქრია. ხშირად ისეთი სიზმარიც გვესიზმრება, რაზეც საერთოდ არ გვიფიქრია და არც შეიძლება რომ მოხდეს. ჩვენს ორგანიზმს, გააჩნია ბიოლოგიური საათი, რომლის დახმარებით შეიძლება განისაზღვროს მოსალოდნელი ცვლილებები და ეს ცვლილებები შეიძლება ვნახოთ რემფაზაში სიზმრის სახით".
ხშირად, სიზმარი ბუნდოვნად ან საერთოდ არ გვახსოვს. ამაში ძილის ფაზებია "დამნაშავე". ძილის თითოეული ფაზა დღე-ღამეში რამდენჯერმე მეორდება, დაძინებიდან დაახლოებით 70-90 წუთში დგება პირველი რემფაზა, ანუ მეხუთე სტადია და შემდეგ ციკლი თავიდან მეორდება. სიზმარი გვამახსოვრდება და მის მოყოლას შევძლებთ მხოლოდ ბოლო რემფაზიდან, რის შემდეგაც გაგვეღვიძა. რაც შეეხება იმ ადამიანებს, რომლებიც თითქოს საერთოდ ვერ ხედავენ სიზმრებს, როგორც ფიზიოლოგი ამბობს, ისინი სიზმრებს ბოლო ფაზაში არ ხედავენ და ადრეული რემძილის დროს ნანახი სიზმრები არ ამახსოვრდებათ _ "მათ თუ გააღვიძებ ადრეული რემძილის შემდეგ, სიზმარს მთლიანად მოყვებიან".
რაც შეეხება გავრცელებულ მოსაზრებას _ სიზმარი სულ რამდენიმე წამს გრძელდება და მხოლოდ ჩვენ გვგონია იგი ხანგრძლივი, ფიზიოლოგი არ ადასტურებს: "რემძილის ფაზა 20-25 წუთი გრძელდება და რამდენადაც ვიცი, ამ ფაზაში ვითარდება სიზმარი. იგი შეიძლება ფაზის განმავლობაშიც გაგრძელდეს. შესაძლებელია არსებობს ამასთან დაკავშირებული ახალი კვლევები და აღმოჩენებიც, რომლებიც მე ჯერ არ ვიცი".
ხშირად გვინდა, ესა თუ ის სიზმარი არ განმეორდეს ან პირიქით, მაგრამ დადასტურებულია, რომ სიზმრების კონტროლი და მით უმეტეს, შეკვეთა შეუძლებელია. ზოგჯერ გვესიზმრება ის, რაზეც მთელი დღეს ვფიქრობთ და ეს შეიძლება მივიჩნიოთ სიზმრის შეკვეთის მცდელობად. თუმცა, მთელი დღე რაღაც საკითხზე ფიქრი არ არის გარანტი, რომ სიზმარს აუცილებლად ნახავთ.
რამდენად შესაძლებელია სიზმრის დახმარებით მომავლის წინასწარმეტყველება? _ თამარ ასანიძე ამბობს, რომ ბიოლოგიური საათის დახმარებით შესაძლებელია მოსალოდნელი ცვლილებების განსაზღვრა. ჩავატარე გამოკითხვა ქუჩაში და ერთ-ერთ სოციალურ ქსელში კითხვით: `გჯერათ თუ არა სიზმრის?~ გამოვკითხე 100 ადამიანი. გამოკითხული ქალების ნახევარს სჯერა სიზმრების, ნახევარს _ არა. მამაკაცებიდან კი მხოლოდ 30%-ს სჯერა. ორივე სქესის წარმომადგენლებისგან მოვისმინე პასუხი: "მჯერა, მაგრამ რელიგია კრძალავს..."
ამ თემით თავის დროზე დაინტერესდა ზიგმუნდ ფროიდიც, რომელსაც მიაჩნდა, რომ ძილის დროს გამორთულია ცნობიერების ნებითი კონტროლი, ამიტომ სიზმრები საშუალებას გვაძლევს, შევისწავლოთ ადამიანის გაუცნობიერებელი ფსიქიკური გამოვლინებანი. კერძოდ, სიზმრებში ვლინდება ფსიქიკის ნევროზული დარღვევები, სიზმრის შინაარსი კი შეესაბამება ადამიანის გაუცნობიერებელ სურვილებს, მისწრაფებებს და მოტივებს. სიზმრის ახსნას კი ორმაგი მნიშვნელობა აქვს: საშუალება გვეძლევა გავიგოთ, რა კავშირშია სიზმარი პიროვნების სულიერ მდგომარეობასთან, მის ბიოლოგიურ ფუნქციებთან და მეორე _ შეგვიძლია გავარკვიოთ, აქვს თუ არა სიზმრის ყოველ ელემენტს თავისი "მნიშვნელობა".
სიზმარი არაერთი ადამიანის წარმატების საწინდარი გახდა, მაგალითად, აინშტაინს დღე-ღამეში 10 საათი ეძინა და ფარდობითობის თეორიის ზოგიერთი ასპექტი სწორედ ძილში აღმოაჩინა. ედგარ პო კი ლექსებს სიზმრებში ხედავდა; მოცარტი სიზმარში მოსმენილ მუსიკას ცხადში წერდა; ფედერიკო ფელინი კი ფილმების სიუჟეტს სიზმარში ქმნიდა.

"ვიცოდი, რომ სხვა არავინ შემიყვარდებოდა"

სამი წლის წინ, პირველ იანვარს, #1 სკოლის მე-10-კლასელები ახალი წლის აღსანიშნავად უნდა შეკრებილიყვნენ. ვახო ერთ-ერთი მათგანის ნათესავი იყო და გადაწყვიტა, გაჰყოლოდა ნათესავს. სწორედ ამ დღეს გაიცნეს ნინომ და ვახომ ერთმანეთი, სიმპათიები მაშინვე გაჩნდა...
რამდენიმე თვის შემდეგ ვახო ნინოს სიყვარულში გამოუტყდა, თუმცა უარი მიიღო... გადიოდა დრო, წყვილი ხანდახან ისევ ხვდებოდა ერთმანეთს. ერთხელაც ნინო მიხვდა, რომ უკვე უყვარდა ვახო...
მერე იყო შეყვარებულობის პერიოდი, პაემნები, სეირნობა ღამის ბათუმში, ვახო მუდმივად უმეორებდა, რომ ძალიან უყვარდა, ნინო ძალიან ბედნიერი იყო _ "ვისაც გამოუცდია ეს გრძნობა, იცის, რას ნიშნავს საყვარელი ადამიანისგან ეს სიტყვები".
ნინო მაგიდის ჩოგბურთზე დადიოდა, ვახო არც ერთ შეჯიბრს არ ტოვებდა და საყვარელ ადამიანს მხარში ედგა... "ძალიან მამხნევებდა მისი დარბაზში ყოფნა..."
შეუღლებაზე ხშირად არა, მაგრამ მაინც ლაპარაკობდნენ _ "ვიცოდი, რომ სხვა არავინ შემიყვარდებოდა და ჩემი მეუღლე აუცილებლად ვახო გახდებოდა, მაგრამ ვერ წარმოვიდგენდი, ასე უცებ თუ გადავწყვეტდით ოჯახის შექმნას."
ერთ დღეს იკამათეს და ვახომ მის მეგობარს დაურეკა, რომელმაც წყვილი მასთან სახლში წაიყვანა, გზაშივე შერიგდნენ და იქვე გადაწყვიტეს, რომ გაპარულიყვნენ. თუმცა, ეს გადაწყვეტილება ყველასთვის მოულოდნელი იყო, რადგან ორივეს მშობლებმა იცოდნენ მათი ურთიერთობის შესახებ და არც არავინ ყოფილა წინააღმდეგი.
ქორწილი მალევე გაიმართა. წყვილს დარბაზში სამი პატარა გოგონა შეუძღვა, რომლებსაც ერთნაირი, ვარდისფერი და ძალიან ლამაზი კაბები ეცვათ. ისინი ვახოს და ნინოს ვარდის ფურცლებს უყრიდნენ, ნინო კი ამ დროს სტუმრებისკენ კანფეტებს ისროდა.
მოწვეული ჰყავდათ ცოცხალი ბენდი და ქორწილი გემოვნებიანი მუსიკით გააფორმეს. ამაზე ვახოს და ნინოს მამებმა იზრუნეს, რადგან, როგორც ნინო ამბობს, არც ერთს არ მოსწონს პოპულარული უხარისხო მელოდიები. იყო ფეიერვერკიც და ფერადი ბუშტებიც... "როდესაც მე და ვახომ პირველი ცეკვა ვიცეკვეთ, ტანში ჟრუანტელი მივლიდა... მელოდიაც ძალიან ლამაზი იყო, ვახომ შეარჩია სპეციალურად."
საქორწინო ჩაცმულობაზე თავად იზრუნეს, ნინოს თეთრი, აჟურული კაბა ეცვა დეკოლტეთი, ვარცხნილობაც თავისი გემოვნებით შეარჩია და თმაში თეთრი, ცოცხალი ყვავილი გაიკეთა. ვახოს კი შავი შარვალ-კოსტიუმი ეცვა. წყვილისთვის "გუდვილში" სპეციალურად დაამაზადეს საქორწილო ტორტი, რომელიც ძალიან ლამაზი და გემრიელი გამოვიდა.
ნინომ თეთრი ვარდებისგან გაკეთებული თაიგულიც ისროლა, ოღონდ წესების ზუსტი დაცვით _ მხოლოდ გასათხოვი გოგონები ელოდებოდნენ თაიგულს. საბოლოოდ ის ნინოს მეჯვარემ დაიჭირა, თუმცა, ჯერჯერობით ცრურწმენა წრურწმენადვე რჩება...
ქორწილის ბოლოს კი, როცა უკვე დაღამდა, ვახომ თავისი საყვარელი მელოდიების დისკი ჩართო _ "ვახოს ძალიან უყვარს კლუბური მუსიკა, დარბაზში იყო განათება და ყველა ცეკვავდა."
საბოლოოდ, ყველაფერმა ლამაზად ჩაიარა, "არ ყოფილა განსაკუთრებული შეჯიბრებები და კურიოზები, არც არავინ დამთვრალა წაქცევამდე და, უბრალოდ, ყველაფერი ძალიან ლამაზი იყო..."

გარდა შეუღლებისა, ვახოს და ნინოს წელს კიდევ ერთი სასიხარულო ამბავი ჰქონდათ, ორივე სტუდენტი გახდა. ოღონდ ნინომ თბილისში ჩააბარა, ვახომ _ ბათუმში. სწორედ ამიტომ თაფლობის თვე არ ჰქონიათ. ისინი შეძლებისდაგვარად ხშირად ნახულობენ ერთმანეთს, ხან ნინო ჩამოდის ბათუმში და ხან ვახო ჩადის თბილისში. ნინო ბათუმში გადმოსვლას გეგმავს. "ძალიან ბედნიერი ვარ, რადგან არაჩვეულებრივი და რაც მთავარია, ჩემთვის საყვარელი ადამიანი მყავს გვერდით", _ ამბობს ნინო.

ნინო ჩიჯავაძე და ვახო კობიძე

სტილი და შეცდომები

არ არსებობს ერთი კონკრეტული გარეგნობა, სტილი თუ მოდა, რომელსაც ყველა საკუთარ თავზე მოირგებს. სილამაზე ისეთივე უნიკალური, მრავალფეროვანი და ინდივიდუალურია, როგორც ქალები მსოფლიოში. უბრალოდ, მნიშვნელოვანია, შეძლოთ სწორი არჩევანის გაკეთება, რათა საკუთარი სტილი შექმნათ.
ამისათვის უნდა იცოდეთ რამდენიმე მთავარი წესი. პირველი და მთავარი არის ის, რომ თავს კომფორტულად გრძნობდეთ შერჩეულ სტილში. ასევე, ძალიან მნიშვნელოვანია ინდივიდუალობა. არ უნდა მიყვეთ სტერეოტიპებს და არ ეცადოთ, გახდეთ ისეთი, როგორიც უნდა სხვას, არამედ უნდა იყოთ ისეთი, როგორიც თქვენ გსურთ. წარმოიდგინეთ იდეალური საკუთარი თავი, როგორიც გინდათ რომ იყოთ... და შექმენით... თუ თქვენ ატარებთ ჯინსის შარვალს და თმას მოკლედ იკრეჭთ, როგორც თქვენი მეგობრები, ამ დროს კი საკუთარი თავი შანელის სტილის კოსტიუმში და გრძელი თმებით წარმოგიდგენიათ, ე.ი. ესაა თქვენი სტილი და არა ის, რომელსაც თქვენი მეგობრები მისდევენ.
სტილის შერჩევისას მნიშვნელოვანია ფერების შერჩევაც. შესაძლოა, თქვენ შავგრემანი ხართ ცისფერი თვალებით და ცისფერი სამოსი ჯადოსნურ სილამაზეს განიჭებთ. იქნებ შავგრემანი ხართ და წითელი ფერი გიხდებათ, ან ქერა ხართ ვერცხლისფერში და ა.შ. ყოველთვის გამოინახება ფერები, რომლებიც თქვენს სილამაზეს გამოაჩენს ან პირიქით, დაჩრდილავს. თუ თქვენს მეგობარს ყვითელი ფერი უხდება, ეს არ არის გარანტი, რომ თქვენც მოგიხდებათ. ეძიეთ თქვენი ფერები.
ასევე, მნიშვნელოვანია გახსოვდეთ, რომ სტილი შედგება არამარტო სამოსისგან და მაკიაჟისგან, არამედ აქსესუარებისგან, სამკაულებისგან და ა.შ. შეიტანეთ თქვენს სტილში სუნამო, კარგი ფეხსაცმელი, ვარცხნილობები და აუცილებლად იმუშავეთ საკუთარ ჯანმრთელობასა და ფიგურაზე. თუ ოცნებობთ ატაროთ ღია ფერის ჯინსები, მაგრამ თეძოებზე მჭიდროდ გაქვთ, ივარჯიშეთ და სპორტი თქვენი ცხოვრების სტილად აქციეთ.
ხშირად, სტილის შერჩევაში თუ უკვე შერჩეულ საკუთარ სტილში შეცდომები მოგვდის, რომლებსაც თავი უნდა ავარიდოთ. არასოდეს უნდა მივენდოთ მთლიანად მოდურ ჟურნალებსა თუ გადაცემებს. ხშირად ჟურნალებში ნანახ სამოსში ვხარჯავთ ფულს და შედეგად კი ეს სამოსი უსარგებლოა.
შემდეგი შეცდომა, რომელსაც ხშირად ვუშვებთ, არასწორი ზომის სამოსის შეძენაა იმ მიზნით, რომ რამდენიმე კილოგრამს დავიკლებთ და გამოგვადგება.
არანაკლებ შეცდომას ვუშვებთ მრავალფეროვანი სამოსის შეძენითაც. სრულიად გამოუსადეგარია ერთი შეხედვით ბევრი ლამაზი ნივთი, რომლებიც უბრალოდ კარადას ავსებენ. თქვენ გაქვთ უამრავი სამოსი, მაგრამ ჩასაცმელი _ არა. იყიდეთ ის სამოსი, რომელსაც ჩაიცვამთ. თუმცა, რომელიმე სტილის ამოჩემებაც არ ვარგა, რაც ძირითადად კლასიკური სტილის შერჩევისას მოგვდის, რადგან ეს სტილი თითქმის ყველა შემთხვევისთვის გამოსადეგია.
განუმეორებლად რომ გამოიყურებოდეთ, შეარჩიეთ სტილი სწორად და შეავსეთ თქვენი საყვარელი სამოსი აქსესუარებით.

როგორ გავწმინდოთ ფანჯარა

ფანჯრების გაწმენდა დიასახლისებისთვის არც თუ ისე საყვარელი საქმიანობაა. აქ ყველა დეტალს აქვს მნიშვნელობა და პატარა ლაქამ მთელი შრომა შეიძლება წყალში ჩაგიყაროს. არადა, სუფთა ფანჯარა დიასახლისის სავიზიტო ბარათია. ამას ემატება ისიც, რომ დასვრილი, მტვრიანი მინები ხელს უშლის სინათლის შემოსვლას 50%-ით.
მოკლედ, მოგვწონს თუ არა, ფანჯრის გაწმენდა აუცილებელია, ამასთან, წელიწადში ორჯერ მაინც ფანჯრები უნდა გაირეცხოს, გაწმენდა კი მას უფრო ხშირად სჭირდება.
ერთ-ერთ საიტზე ამასთან დაკავშირებულ რჩევებს გავეცანი. უპირველეს ყოვლისა, გაითვალისწინეთ, რომ ფანჯრები ცხელ ან ქარიან ამინდში არ უნდა გაწმინდოთ, რადგან სწრაფად გამშრალ მინაზე ცისარტყელასებური ლაქები წარმოიქმნება.
დასაწყისისთვის მინებს რბილი ტილოთი უნდა მოაშოროთ მტვერი და მხოლოდ შემდეგ რომელიმე სარეცხი საშუალებით გაწმინდოთ ისინი. შემდეგ კი ფანჯრის მინები, ჩარჩო და რაფა თბილი წყლით უნდა გარეცხოთ და ბოლოს გადაავლოთ ცივი წყალი.
ეფექტური და გამოცდილი საშუალებაა ცარცით გაწმენდა. მინა ჯერ სველი რბილი ტილოთი გაწმინდეთ და შემდეგ ბამბის ტამპონით წაუსვით ცარცის ფხვნილის ნაყენი. გაშრობის შემდეგ გაწმინდეთ მშრალი ტილოთი.
ბევრი დიასახლისი უპირატესობას ანიჭებს ასევე ნიშადურის სპირტს (ერთი სუფრის კოვზი ერთ ლიტრ წყალში), რომლითაც კარგად ირეცხება როგორც მინები, ასევე ფანჯრის ჩარჩო და რაფა.
თუ გინდათ მინამ სარკისებური ბრწყინვალება შეიძინოს, გაწმინდეთ იგი ერთი სუფრის კოვზი სახამებლისა და ერთი ლიტრი ცივი წყლის ნაზავით. მინა კარგად რომ პრიალებდეს, გაწმინდეთ ძმრით და ცოტა ხნის შემდეგ წყლით გაასუფთავეთ.
ბუზების ნაკვალევი ნიშადურის სპირტისა და წყლის თანაბარი ნაზავით უნდა გაწმინდოთ. ძლიერ დასვრილი მინები ადვილად იწმინდება თბილი წყლით, რომელშიც ცოტა სპირტი იქნება ჩამატებული. იმისთვის, რომ ფანჯრები არ გაიყინოს, შიდა მხარე კარგად გაწმინდეთ სპირტისა და გლიცერინის ნაზავით.
ტილოთი გაწმინდეთ ფანჯრის ჩარჩო, შემდეგ წყალში დასველებული გაზეთით გაწმინდეთ მინა და ბოლოს მშრალი გაზეთით ფანჯრის ერთი მხარე ზევიდან ქვევით, მეორე კი მარცხენიდან მარჯვნივ გაამშრალეთ. ასე ადვილად შეიმჩნევა დარჩენილი ლაქები. ზამთარში ფანჯრის მინები ხშირად ყინულის ფენით იფარება. მისი მომტვრევა არ ღირს, უკეთესია იგი მარილიანი ტილოთი გაწმინდოთ. მარილი `შეჭამს~ ყინულს, მინა კი სუფთა და გამჭვირვალე გახდება.

ფილმები, რომლებიც "აუცილებლად" უნდა ნახოთ

ყველა ადამიანს აქვს ერთი საყვარელი ფილმი, რომელსაც ნებისმიერ დროს დიდი სიამოვნებით უყურებს, თუმცა გამუდმებით ერთსა და იმავეს ყურებ მოსაბეზრებელია. როცა საქმე კარგ ფილმს ეხება, რაღაც ახალი არასოდეს არის ადგილო. ჰოდა, კარგი ფილმების შესახებ მეგობრებსა და უცნობებში მოვიკითხე. იმედი მაქვს, მათგან რომელიმე თქვენთვის ახალი და საინტერესო იქნება.

Remember Meყველასათვის ცნობილი სერიალების _ "სოპრანოს კლანისა" და "სექსი დიდ ქალაქში"- რეჟისორის, ალენ კულტორის უახლესი დრამაა. ნინო აშბას თქმით, ფილმში უამრავი ადამიანური გრძნობაა ასახული, მათ შორის სიყვარულიცასე რომ, დრამებისა და მელოდრამების მოყვარულებს შესანიშნავი შანსი გაქვთ, კიდევ ერთხელ დაღვაროთ ცრემლები ცისფერი ეკრანების წინ.

ტონი სკოტის რომანტიკული დრამის _ "True Romance"-ის ნახვას გირჩევთ ნინა მასალკინა _ "სხვათა შორის, პოპსა ფილმია, თუმცა ძალიან კარგი პოპსაა. ასევე შესანიშნავი ფილმია ჯიმ ჯარმუშის “Cofee and Sigarets” (2003) და "Breaqfast At Tifoni" (1961), ოდრი ჰეპბერნის მონაწილეობით. ვფიქრობ, ძალიან კარგი სანახავი იქნება გოგონებისთვის”.



კარენ გასპარიანი “Fear & loathing in Las Vegas”-ის ნახვას გირჩევთ, რომელიც ამერიკელი ჟურნალისტის _ ჰანთერ ტომპსონის რომანის მიხედვით 1998 წელს ტერი გილიამმა გადაიღო. ფილმის სიუჟეტი ნარკოტიკებით გაჟღენთილი ჟურნალისტისა და მისი ადვოკატის ლას ვეგასში საქმიანი ვიზიტის შესახებ მოგვითხრობს. მთავარი როლის შემსრულებლები: ჯონი დეპი, ბენისიო დელ ტორო და მათი ჰალუცინაციები.

საშინელებათა ფილმებისა და მისტიკის მოყვარულთათვის ნინო არქანიამ შემდეგი ფილმები გვირჩია: "Eternal” – 2004 წელს, ვილჰელმ ლიბენბერგისა და ფედერიკო სანჩესის მიერ გადაღებული ფილმი, რომლის მთავარი გმირი ისტორიული რკინის ლედის, ელიზაბეტ ბატორის თანამედროვე პროტოტიპია.

მეორე ფილმი კი _ "Mirrors”, 2009 წელსაა გადაღებულ, ფრანგი რეჟისორის, ალექსანდრე აჟას მიერ გადაღებული თრილერი, რომლის სიუჟეტიც, როგორც სათაურიდან მიხვდით, სარკეებზეა, რომლებიც ყოველთვის სიმართლეს არ აჩვენებენ.

დასანანია, რომ ჩამოთვლილ ფილმთა სიაში ვერ მოხვდა რამდენიმე შესანიშნავი ფილმი, ამიტომ თავს მივცემ უფლებას და რამდენიმე ფილმს საკუთარი გემოვნებითაც გირჩევთ, აი ისინიც: ემირ კუსტურიცას _“Arizona dream” (1993); გერმანელი რეჟისორის, ვოლფგან ბეკერის ფილმი _“Good Bye, Lenin!” (2003); მიშელ გონდრის დრამა, ნახევრად ფანტასტიკა _ “Eternal Sunshine of the Spotless Mind”, სპაიკ ჯონსის ფანტასყ ფილმი – “Where The Wild Things Are”(2009); Karen O- ფანტასტიური საუნდთრეკებით და ფრედერიკ ბეგბედერის რომანის ეკრანიზაცია _ "99Francs” (2007).

როგორ შევაჩეროთ სლოკინი

ეს შესაძლებელია სასაცილოდ მოგეჩვენოთ, მაგრამ თუ გავითვალისწინებთ, რა ხშირად გვაყენებს იგი უხერხულ მდგომარეობაში, ნამდვილად ღირს რამდენიმე რჩევის მიღება მის შესაჩერებლად.

სლოკინისას არ ღირს მთელი ყურადღების მასზე მობილიზება, მისი ძალით შეჩერებისას თქვენ დიაფრაგმის კუნთებს ძაბავთ და ამით უფრო ძლიერდება სლოკინი.

არსებობს რამდენიმე საშუალება, რომლებიც ამ არასასიამოვნო მოვლენის გაქრობაში დაგეხმარებათ.

შეისუნთქეთ და დაახლოებით ათი წამით შეწყვიტეთ სუნთქვა, შემდეგ ამოისუნთქეთ და პატარა ყლუპებით დალიეთ რთი ჭიქა წყალი, ან რამდენჯერმე გადაყლაპეთ ნერწყვი.

შეგიძლიათ ასევე საჩვენებელი თითებით დაიცოთ ყურები, ნეკებით კი ცხვირი ან ცერა და საჩვენებელი თითებით მაგრად მოუჭირეთ ცხვირს იმ ადგილას, სადაც ძვალი მთავრდება და იწყება ხრტილი.

ასევე კარგი საშუალებაა სლოკინის შესაჩერებლად რაიმე მწარე ან მჟავე საკვები, მაგალითად, ლიმონის ერთი ნაჭერი. ასევე ეფექტურია ერთი (ან ორი) / შაქარი.

კიდევ ერთი ძალიან ეფექტური საშუალებაა ცივი წყლის დალევა.

თუ სლოკინი თქვენს მეგობარს აუტყდა, გახსოვდეთ, რომ ყველაზე ეფექტურია ხმაურით უეცარი შეშინება და ყურადღების რაიმე საინტერესო თემაზე გადატანა.