თავდაცვა თავდასხმისგან

მიუხედავად იმისა, რომ გასულ წლებთან შედარებით დღეს ქუჩაში სიარული არც ისე სახიფათოა, შემთხვევებისგან თავის დაცვა აუცილებელია, მით უმეტეს ქალებისთვის.

მოსალოდნელი საფრთხისგან თავდაცვის ხერხებზე კარატისტი და შავი ქამრის მფლობელი, ნოდარ ხაჯიშვილი გვესაუბრა.

“უპირველეს ყოვლისა, უნდა შეეცადოთ დიალოგისას კონფლიქტში არ შეხვიდეთ. თუ არის შესაძლებლობა, აუცილებლად გაიქეცით. თუ გაქცევა შეუძლებელია, შეეცადეთ, დაარწმუნოთ თავდამსხმელი მისი საქციელის გაუმართლებლობაში, აუხსენით, რომ შეცდომას უშვებს და ეს არამარტო თქვენთვის, მისთვისაც ცუდი შედეგის მომტანია. თუმცა, გასათვალისწინებელია ისიც, რომ ამით შეიძლება უკუშედეგი მივიღოთ და უფრო გავაღიზიანოთ მოწინააღმდეგე.

თუ პირველმა ორმა ხერხმა შედეგი არ გამოიღო, დროა მოქმედებაზე გადახვიდეთ და სანამ თვითონ მოიმოქმედებდეს რამეს, შეუტიოთ მოწინააღმდეგეს. ადამიანის სხეულზე არის რამდენიმე სუსტი წერტილი, რომლებზე ზეწოლისას ადვილად შეიძლება თავდამსხმელისგან გათავისუფლება. მაგალითად, ორივე გაშლილი ხელისგულის გარემხარე ჰორიზონტალურ მდგომარეობაში უნდა ჩაარტყათ ნეკნებში, ან გაშლილი ხელით პირდაპირ ყელში, ცხვირზე, თვალებსა ან კუჭზე უნდა შეუტიოთ. მტკივნეულია წვივებზე დარტყმაც, ოღონდ დაიმახსოვრეთ, რომ ამ შემთხვევაში მარჯვენა წვივზე მარჯვენა ფეხითვე ურტყამთ, მარცხენაზე _ მარცხენათი, რადგან ამ დროს წვივი გახსნილია და ზუსტად წვივზე ურტყამთ და არა _ მახლობლად. ეფექტურია ფეხებს შუა ამორტყმაც. ოღონდ გახსოვდეთ, რომ მას შემდეგ, რაც რომელიმე დარტყმა შედეგს გამოიღებს, აუცილებლად უნდა განერიდოთ მოწინააღმდეგეს. თქვენმა დარტყმამ ორი შედეგი შეიძლება გამოიღოს _ თავდამსხმელი თავს დაგანებებთ, რადგან დარტყმის შემდეგ იგრძნობს დანაშაულს, ან მოულოდნელი შეტევა შეაშინებს, მეორე შემთხვევაში კი დარტყმა უფრო გააღიზიანებს და შედეგად უფრო საშიში გახდება, თვითონაც გადავა შეტევაზე.

დაიმახსოვრეთ, რომ დარტყმის მომენტში არ უნდა დაიძაბოთ, რადგან ამ დროს ორგანიზმი დისკომფორტს განიცდის, იკეტება, შინაგანი ენერგიის ბლოკირება მიმდინარეობს და იზღუდები. თავისუფლად უნდა იყოთ, ხელიც თავისუფლად წაიღოთ მოწინააღმდეგისკენ და შემდეგ უკვე მძიმედ დაარტყათ, მხოლოდ ამ შემთხვევაში იქნება თქვენი დარტყმა მტკივნეული და შესაბამისად, შედეგის მომტანი.

გარდა ამისა, მოწინააღმდეგის შეშინება შესაძლებელია ყვირილითაც. დარტყმისას აუცილებლად იყვირეთ, ისე, რომ მოწინააღმდეგე შეშინდეს, ეს არის უდიდესი ფსიქოლოგიური ზემოქმედება, თითქმის დარტყმის ანალოგიურია და ამაში მდგომარეობს ჩხუბის ხელოვნება.

არსებობს თავდაცვის კიდევ რამდენიმე ხერხი, მაგალითად, თუ თავდამსხმელი უკანა მხრიდან მოგეპარათ, იდაყვი ჩაარტყით სახეზე ან კუჭთან. თუ ხელები შეგიკრათ, ფეხის ქუსლი უნდა დაარტყათ. თუმცა, მსგავსი ხერხების გამოყენება არც ისე მარტივია და თუ გინდათ ეს ყველაფერი უმაღლეს დონეზე გააკეთოთ, ვარჯიშია საჭირო. ჩვეულებრივი ადამიანი, ვინც ჩხუბი არ იცის, ამას ვერ გააკეთებს”.

გაითვალისწინეთ, რომ გარდა თავდაცვის რამდენიმე ხერხის ცოდნისა, აუცილებელია დაფიქრდეთ იმაზეც, თუ რა მდგომარეობაში ჩავარდება თქვენი მოწინააღმდეგე ამ ხერხების გამოყენების შემდეგ და ფსიქოლოგიურად ამისთვისაც მზად უნდა იყოთ. თუმცა, როგორც ნოდარ ხაჯიშვილი ამბობს, თუ უბრალო მოკვდავი ხართ და არა რომელიმე სპორტის მიმდევარი, თქვენი დარტყმა ფატალური არ შეიძლება აღმოჩნდეს, ადამიანის დაზიანებას და თავიდან მოცილებას კი ადვილად შეძლებთ.

მან კი, ვისაც სხვადასხვა მიზეზის გამო დარტყმა არ შეუძლია, სასურველია შეიძინოს ცრემლსადენი გაზის პატარა ბალონი. გაზი მოწინააღმდეგეს თვალებში უნდა შეასხათ. მისი შეძენა ბარათაშვილის ქუჩაზე, იარაღების მაღაზიაში შეგიძლიათ დაახლოებით 20 ლარად. აქვე იყიდება .. “გაზის პისტოლეტი”, რომელიც რეზინის ტყვიებს ისვრის და მისი ფასი 180 ლარამდეა. როგორც მაღაზიის თანამშრომელი, ზაზა ბერიძე ამბობს, ამიარაღისტარება ჩანთით ან სულაც ქამარზე დამაგრებული შეგიძლიათ. იყიდება ელექტროშოკებიც, თუმცა კერძო პირებისთვის მათი მიყიდვა ნებადართული არ არის.

სისუფთავე სააბაზანოში

მიუხედავად არსებული უამრავი სარეცხი საშუალებისა, ხშირად სააბაზანოში გაჩენილ ლაქებთან გამკლავება რთულია. გთავაზობთ რამდენიმე რჩევას, რაც ამ პრობლემის მოგვარებაში დაგეხმარებათ.

ყველას გვინდა სააბაზანოში ნიჟარა ახალივით თეთრი იყოს, თუმცა ზოგჯერ ხშირი გაწმენდის მიუხედავად, მოყვითალო-მოშავო შეფერილობას იღებს. ამის თავიდან ასაცილებლად, ერთ-ერთი გავრცელებული და ეფექტური მეთოდია ნიჟარის რაც შეიძლება ხშირად გარეცხვა ცხელი წყლისა და სარეცხი სოდის ნაზავით (ერთი სუფრის კოვზი სარეცხი სოდა ერთ ლიტრ ადუღებულ წყალში). ონკანის ირგვლივ გაჩენილი ლაქები კი ადვილად გაქრება, თუ თბილ ძმარში დასველებული ტილოთი გაწმენდთ. ნიკელის ონკანზე ლაქები შემთბარი ძმრის საშუალებით უნდა მოაცილოთ, რამდენიმე წუთის შემდეგ კი გარეცხეთ სუფთა წყლით და რბილი ტილო გადაუსვით.

გაითვალისწინეთ, რომ არაა რეკომენდებული ემალირებული ნივთების გაწმენდა ქვიშით ან ზუმფარას ქაღალდით (.. `შკურკა~), რადგან ასე ზიანდება დამცავი ფენა, შედეგად ის უფრო ხშირად და ძლიერად ბინძურდება.

გაყვითლებული ემალირებული აბაზანა მარილით და ძმრით უნდა გაწმინდოთ. ან ჯოხზე დახვეული ტილო დაასველეთ ხსნარით, რომლის ორი მესამედი იქნება წყალი და ერთი მესამედი ტექნიკური მარილიანი მჟავა. გააჩერეთ 10 წუთით, შემდეგ კი თბილი წყლისა და სარეცხი ფხვნილის ნაზავით გაწმინდეთ და რამდენჯერმე გადაავლეთ სუფთა წყალი.

იმისთვის, რომ აბაზანას თავდაპირველი სითეთრე დაუბრუნოთ, აურიეთ საჭმელი სოდა და რამდენიმე წვეთი ნიშადურის სპირტი, დაასველეთ შედარებით უხეში ტილო და გაწმინდეთ. სხვათა შორის, სოდა მიკრობებსაც სპობს.

შემდეგისთვის კი გაითვალისწინეთ, რომ ყვითელი ლაქები ჩნდება წყლის ტემპერატურის მკვეთრი ცვლილების შედეგად. არ გამოუშვათ არც ძალიან ცივი, არც ძალიან ცხელი წყალი, დაიწყეთ გრილით. ასე ემალიც დიდხანს გაძლებს და ბზარებიც არ გაჩნდება.

ლაქები, რომლებიც გარეცხვის შედეგად რჩება, შეიძლება გააქროთ პემზის ფხვნილით, მაგრამ ფრთხილად უნდა გამოიყენოთ, რათა ემალის ზედა ფენა არ დააზიანოთ.

სააბაზანოს კაფელი კი ერთი ლიტრი წყლისა და ერთი ჭიქა ძმრის ნარევით გაწმინდეთ.

დიასახლისი ნანა მოქია ამბობს, რომ ერთ-ერთი ყველაზე ეფექტური სარეცხი საშუალება `დომესტოსია~. ის ასევე გირჩევთ სურნელოვანი სპრეის გამოყენებასაც.