ვარჯიში ოფისში

თუკი თქვენ დღის უმეტეს ნაწილს ოფისში, მაგიდასთან მჯდარი ატარებთ, მაშინ აუცილებლად გჭირდებათ ვარჯიშები, რომლებიც დაღლილობის მოხსნასა და კარგი ფორმის შენარჩუნებაში დაგეხმარებათ.

ნებისმიერი ვარჯიში გახურებით იწყება, ამისთვის კი შესანიშნავი საშუალებაა კიბეზე 3 სართული აიარ-ჩაიაროთ, ეს დადებითად იმოქმედებს თქვენს სისხლძარღვთა სისტემაზე და ცოტა ხნით მომაბეზრებელ და რუტინულ სამუშაოსაც მოსწყდებით.

შემდეგი ვარჯიში თეძოებისთვისაა განკუთვნილი, თუმცა მუცლის პრესს და ზურგსაც ძალიან უხდება: დაჯექით სკამის ბოლოზე. ფეხები აუცილებლად ერთმანეთზე უნდა იყოს მიდგმული, შემდეგ ამავე მდგომარეობაში რიგრიგობით ან ერთად გამართეთ ფეხები ისე, რომ ფეხის წვერები თქვენკენ მოქაჩოთ. ამ დროს ზურგი აუცილებლად სწორად უნდა გეჭიროთ. ვარჯიში გრძელდება მანამ, სანამ კუნთებში მსუბუქი წვის შეგრძნება არ გაჩნდება.

თეძოს კუნთების შიდა მხარის გასამკვრივებლად კარგია პატარა გასაბერი ბურთის გამოყენება. იგი მუხლებს შუა უნდა მოაქციოთ და რიტმულად მოუჭიროთ ფეხებით მანამ, სანამ კუნთები არ დაგეღლებათ.

თეძოს კუნთებისთვის ასევე სასარგებლოა შემდეგი სახის ვარჯიში. გაიხადეთ ფეხსაცმელი და მაგიდის ქვეშ ფეხები მხრების სიგანეზე დაალაგეთ, წელში გასწორდით და დაჭიმეთ მუცლის კუნთები. მონაცვლეობით დააწექით იატაკს ფეხის ტერფებით ისე, რომ დაძაბულობა 5-6 წუთს გაგრძელდეს. ვარჯიში თითო ფეხით 10-ჯერ უნდა შეასრულოთ.

ხერხემალზე დაძაბულობასა და დაღლას შემდეგი ვარჯიში მოგიხსნით. სკამზე დამჯდარმა ხელები მუხლებზე დაიწყვეთ, თავი სწორად დაიჭირეთ, შემდეგ ნელ-ნელა გამოსწიეთ მკერდი წინ და თავი ოდნავ ზევით ასწიეთ, ამის შემდეგ ამოისუნთქეთ და თავი პირიქით, ძირს დახარეთ და ზურგშიც მოიხარეთ. ვარჯიშის ხანგრძლივობა სულ რაღაც 1-3 წუთია.

წელზე დაძაბულობას მოგიხსნით და მას მეტ ელასტიურობას შემატებს შემდეგი სახის ვარჯიში. დადექით და ფეხები მხრების სიგანეზე დაალაგეთ. ხელის გულებით დაიკავეთ წელი ისე, რომ ცერა თითები თეძოებზე ხვდებოდეს. ღრმად შეისუნთქეთ ცხვირით და კორპუსი მარცხენა მხარეს მოაბრუნეთ, გამოსუნთქვისას კი მარცხენა ფეხისკენ დაიხარეთ, ამავდროულად ნელ-ნელა ატრიალეთ კორპუსი მარჯვენა მხარეს, შემდეგ ისევ ღრმად შეისუნთქეთ და ამოსუნთქვისას წელში გასწორდით. ამგვარი მოძრაობები ორივე მხარეს, 3-4ჯერ უნდა გაკეთდეს.

ხელის კუნთების (ტრიეფსის) გასამაგრებლად ზურგით შებრუნდით მაგიდისკენ და მას ხელის გულებით დაეყრდენით. ხელები იმ დონეზე უნდა გაწიოთ უკან, რომ მხრები წამოგეწიოთ. ფეხები ოდნავ მოხარეთ მუხლებში ისე, რომ სხეულის მთელი სიმძიმე ხელებზე გადავიდეს. შემდეგ ხელები მოხარეთ და ისევ გამართეთ. ვარჯიშის ხანგრძლივობა თქვენზეა დამოკიდებული.

და ბოლოს, ყველაზე მარტივი ვარჯიში, რომლის გაკეთებაც ყველას და ყველგან შეუძლია: სკამზე დამჯდარმა, ფეხი ფეხზე გადაიდეთ და ერთი წუთის განმავლობაში, იმ ფეხის ტერფით, რომელიც ჰარშია 4 წრე დაატრიალეთ მარჯვნივ და მარცხნივ. შემდეგ ფეხი შეცვალეთ და ისევ იგივე გაიმეორეთ.

ამგავრი ვარჯიშები შეგიძლიათ მთლიან სამუშაო დღეზე გადაანაწილოთ ან ყველა ერთდროულად გააკეთოთ, სულ რაღაც 20 წუთი არაფერია, ჩვენი ჯანმრთელობისა და სილამაზის შესანარჩუნებლად.